अनौपचारिक क्षेत्र सेवा केन्द्र(इन्सेक) को पहलमा गठन भएको जिल्ला स्तरीय बेद युवा समूहले सामुहिक अदुवाखेतीमार्फत उत्पादित अदुवा विक्रीबाट ५० हजार रुपियाँ आम्दानी गरेको छ ।
इन्सेकको इएलपी कार्यक्रम अन्तर्गत बेद माध्यमिक विद्यालय बगनासकाली–९ बराङ्दीमा गठन गरिएको युवा समूहले समुदाय स्तरमा रचनात्मक अभियानमा चलाउँदै आएको छ । जसका कारण युवा समूह समुदाय स्तरमा लोकप्रिय समेत बनेको छ ।
युवा समूहले बगनासकाली गाउँपालिका–८ बराङ्दी न्यौपाने डाँडामा तीन रोपनी जग्गा भाडामा लिई सामूहिक अदुवा खेती गरेको थियो । अदुवा खेतीका लागि आवश्यक तालिम, मल, जग्गा भाडा वापतको रकम र ३ सय केजी अदुवाको बिउ बगनासकाली गाउँपालिकाले उपलब्ध गराएको थियो ।
बारीमा ८ सय ३४ केजी अदुवा उत्पादन भएको र प्रति केजी ६० रुपियाँका दरले विक्री गरी आएको रकममध्ये ५० हजार रुपियाँबाट युवा समूहले समुदाय स्तरमा रचनात्मक अभियानहरू सञ्चालन गर्ने युवा समूहका अध्यक्ष बरूण बस्यालले बताए ।
कक्षा ११ र १२ मा पढ्ने विद्यार्थीहरूले पनि केही गरेर देखाउन सक्छन् भन्ने कुराको समुदायमा उदाहरण दिन, स्थानीय तह, गाउँपालिका र वडा कार्यालयसँग युवाहरूको समन्वय बढाउन तथा इन्सेकको कार्यक्रम नभएको अवस्थामा समेत युवा समूहलाई निरन्तरता दिन पनि सामूहिक अदुवा खेती गरिएको अध्यक्ष बस्यालले बताए ।
अदुवा निकाल्ने क्रममा अनुगमन गर्दै बगनासकाली गाउँपालिकाका अध्यक्ष कृष्णप्रसाद बस्यालले युवाहरूको यो प्रयास जिल्लामै नमूना रहेको बताए ।
उनले यसप्रकारको अभियानमा गाउँपालिका सधैँ सहयोगीको रूपमा रहेको बताए । अदुवा निकाल्ने कार्यमा समेत युवाहरूले नै सक्रियतापूर्वक काम गरेका थिए ।
गत जेठ महिनामा युवाहरूले सामूहिक रूपमा अदुवा रोपेका थिए । जसमा बगनासकाली गाउँपालिकाका अध्यक्ष, उपाध्यक्ष सहित जनप्रतिनिधि, सामाजिक व्यक्तित्वहरू तथा युवा समूहका सदस्यहरूको सहभागिता रहेको थियो ।
आगामी दिनमा समेत युवा समूहले कार्ययोजना बनाई समुदाय स्तरमा अझ रचनात्मक अभियानहरू सञ्चालन गर्ने समूहका सचिव जीवन न्यौपानेले बताए ।
