पूर्व कम्लरीहरूको तत्काल उद्धार गर्न मुक्त कम्लरी विकास मञ्चकी केन्द्रीय अध्यक्ष सुनिता चौधरीले मङ्सिर १२ गते घोराहीमा मुख्यमन्त्रीलाई आठ बुँदे मागपत्र सहित ज्ञापन पत्र बुझाएकी छन् ।
मुक्त कम्लरी विकास मञ्चले अझै पनि बालिकाहरू कम्लरी बस्न बाध्य भएको भन्दै तत्काल उद्धार गर्न प्रदेश ५ का मुख्यमन्त्री शङ्कर पोख्रेललाई आग्रह गरेको छ ।
ज्ञापनपत्रमा देश मुक्त कम्लरी राष्ट्र घोषणा भइसकेको र कुनै पनि बालबालिकालाई श्रममा लगाउन नपाइने व्यवस्था भएपनि अहिले पनि कम्लरीका नाममा बालिकाहरू बाधा मजदुरको रूपमा काम गर्नु परिरहेको भन्दै उनीहरूको तत्काल उद्धार गरी उचित पुनस्र्थापनाको माग गरिएको छ ।
यसअघि उद्धारका लागि कम्लरी बालिकाको नाम, ठेगाना र कम्लरी राख्नेहरूको नामावलीसमेत सम्बन्धित जिल्लाका प्रमुख जिल्ला अधिकारीहरूलाई बुझाए पनि अहिलेसम्म उद्धारको कुनै पनि काम हुन नसकेको भन्दै मुख्यमन्त्रीको ध्यानाकर्षण गराइएको मुक्त कम्लरी विकास मञ्चकी अध्यक्ष सुनिता चौधरीले बताइन् ।
उनका अनुसार पश्चिम नेपालका दाङ, बाँके, बर्दिया, कैलाली र कञ्चनपुरमा बालिकाहरू अर्काको घरमा बाँधा मजदुरको रूपमा रहेका छन ।
मुक्त कम्लरी विकास मञ्चका अनुसार दाङका १८, बाँकेका चार, बर्दियाका २९, कैलालीका २२ र कञ्चनपुरका ६ गरी ७९ जना बालिकाको उद्धार गर्न बाँकी रहेको छ ।
उनीहरूलाई लुकिछिपी घरको काममा लगाइएको मञ्चले जनाएको छ । त्यसैगरी केही बालिकाहरू कम्लरीको रूपमा लगेर बेपत्ता पारिएकाले उनीहरूको खोजी गरिनुपर्ने माग समेत गरिएको छ ।
दाङमा ५ हजार १ सय ९७ जना कम्लरी मुक्त भइसकेका छन् भने बाँकेबाट ७ सय ६३, बर्दियाबाट २ हजार ८ सय ३८, कैलालीबाट ४ हजार १ सय ६९ र कञ्चनपुरबाट ९ सय २ गरी १२ हजार ८ सय ६९ जना मुक्त भएको मुक्त कम्लरी विकास मञ्चले जनाएको छ ।