२० वर्षीया महिलालाई अपहरण तथा शरीर बन्धक गरी बलात्कार गरेको आरोपमा प्रहरीले बलवा नगरपालिका–११ का २१ वर्षीय सुजितकुमार मण्डललाई ०८२ साउन २६ गते गिरफ्तार गरेको छ ।
घटनापछि फरार रहेका आरोपित सुजित मण्डल लुकिछिपि घरमा आएको गोप्य सूचनाको आधारमा गिरफ्तार गरेको प्रहरीले जानकारी दिएको छ ।
आरोपित मण्डलले ०८१ चैत २१ गते झुठो प्रेमजालमा फसाइ विभिन्न प्रलोभन देखएर भारतको चेन्नइ लगी बन्धक बनाएर सुजित र उनका साथी सोही ठाउँ बस्ने २१ वर्षीय अमितकुमार यादवले पटक पटक बलात्कार गरेको पीडितको आरोप छ । घटनामा आरोपितहरुलाई सोही ठाउँका २१ वर्षीया चन्चलाकुमारी यादव र ४८ वर्षीय उपेन्द्र यादवले सहयोग गरेको पीडितको आरोप छ ।
पीडित परिवारले ०८१ चैत २५ गते खोज तलासका लागि जिल्ला प्रहरी कार्यालय महोत्तरीमा निवेदन दिएका थिए । पीडित महिला असार ४ गते परिवारको सम्पर्कमा आएको परिवारले बताएका छन् ।
पीडितको स्वास्थ्य परीक्षण साउन १ गते प्रादेशिक अस्पताल जलेश्वरमा भएको जिल्ला प्रहरी कार्यालयका इन्स्पेटर अशोक झाले बताउनु भयो । पीडित परिवारले आरोपितहरु विरुद्ध साउन १ गते जिल्ला प्रहरी कार्यालयमा उजुरी दिएका थिए ।
घटनामा संलग्न अन्य आरोपितहरु फरार रहेकोले खोजि कार्य जारी रहेको प्रहरीले जनाएको छ ।