२४ वर्षीया विवाहित महिलाले जनकपुरधाम उमनपा–१३ का वडा अध्यक्ष शुभनारायण मण्डलका ३० वर्षीय छोरा रोशनकुमार मण्डलले असार १२ गते बलात्कार प्रयास गरेको भन्दै इलाका प्रहरी कार्यालय मुजेलिया र जिल्ला प्रहरी कार्यालयमा असार १७ गते उजुरी दिँदा दर्ता नगरेको आरोप लगाउनु भएको छ ।
पीडित महिलाका अनुसार पति घर बाहिर गएको बेला आरोपित मण्डल घरमा आएर बलात्कार प्रयास गरेको र आफूले प्रतिकार गर्दा गालामा थप्पड हान्दा आफ्नो नाकबाट रगत बगेको बताउनु भयो ।
नाकबाट सामान्य रगत आएकाले स्थानिय क्लिनिकमा उपचार गरीएको भएपनि घाउ चेकजाँच नगराइएको पीडित महिलाले इन्सेक धनुषा प्रतिनिधिलाई बताउनु भयो ।
पीडित महिलाले आरोपित मण्डलले आफूलाई यसअघि समेत पटक–पटक शारीरिक सम्बन्ध राख्न र घुम्न घर बाहिर जान दबाब दिँदै आएको बताउनु भयो ।
उजुरी दिन जिल्ला प्रहरी कार्यालय धनुषामा आएका बेला इन्सेक धनुषा प्रतिनिधिलाई भेटेका पीडित महिलाका पतिले आफु घर बाहिर गएको बेला आरोपित मण्डल घरमा आएर पत्नीलाई बलात्कार प्रयास गरेको बताउनु भयो ।
पीडित महिलाका पतिका अनुसार आफू घरमा आउँदा आरोपित मण्डलले पत्नीलाई बलात्कार प्रयास गर्न खोजेको देखेपछि प्रतिकार गर्न खोज्दा आफूलाई समेत गालीलगौज गर्दै कुटपिट गरेको बताउनु भयो ।
पीडित महिलाका पतिका अनुसार पहिले प्रहरीले मुद्दा दर्ता गरि दिने आश्वासन दिएपनि पछि राजनैतिक दबाबमा आएर महिला तथा बालबालिका सेलमा पठाई मिलापत्र गर्न दबाब दिएको बताउनु भयो ।
यता, वडा अध्यक्ष मण्डलले पीडितलाई फोन गरेर तिमीहरूबाट केही हुनेवाला छैन भन्दै धम्काउँदै आएको पीडितले बताउनु भयो ।
जिल्ला प्रहरी कार्यालय धनुषा अन्तर्गत महिला तथा बालबालिका सेलकी असई दीपिका ओझाका अनुसार पीडित पक्षले बलात्कार प्रयास गरेको भनेर उजुरी दिन जिल्ला प्रहरी कार्यालय धनुषामा आएको बताउनु भयो ।
घटनाबारे प्रहरीले अनुसन्धान गरिरहेकाले तत्कालै उजुरी दर्ता नभएको असई ओझाले बताउनु भयो । प्रहरीले घटनाको वास्तविकता अध्ययन गरेर पीडित पक्षले दिएको उजुरी दर्ता गर्ने असई ओझाले बताउनु भयो ।