निर्मला पन्तको हत्या घटनामा संलग्न भएको भन्दै दिलिप विष्टलाई गिरफ्तार गरी सार्वजनिक गरेपछि वास्तविक दोषीलाई प्रहरीले उम्काउन खोजेको भन्दै भइरहेको प्रदर्शनकारी र प्रहरीबिच भएको झडपमा भदौ ७ गते प्रहरीले चालएको गोली लागि चार जना प्रदर्शनकारी घाइते भएका छन् ।
जिल्ला प्रशासन कार्यालयलाई घेराउ गर्न जाँदा प्रदर्शनकारी र प्रहरीबिच झडप भएपछि स्थिति नियन्त्रणमा लिनका लागि प्रहरीले प्रहार गरेको गोली लागी भिमदत्त नपा-२ का अर्जुन भण्डारी, भिमदत्त नपा-३ का तेज भट्ट, वेदकोट नपा-७ का तिर्थराज पनेरू र कैलालीका सन्तोष कठरीया घाइते भएका छन् ।
प्रहरीको गोली लागि घाइते भएका तेज भट्ट, तिर्थराज पनेरू र सन्तोष कठरीयाको उपचार महाकाली अञ्चल अस्पतालमा भइरहेको छ भने अर्जुन भण्डारीको अवस्था गम्भीर भएको भन्दै थप उपचारका लागि कोहलपुर मेडिकल कलेज रिफर गरिएको छ ।
प्रहरी र प्रदर्शनकारीबिच भएको झडपले कञ्चनपुर जिल्लाको अवस्था तनावपुर्ण भएको छ । आन्दोलनकारीले महेन्द्रनगर बजारको चोक-चोकमा भेला भएर प्रदर्शन गरिरहेका छन् ।
भीमदत्त नपा-२ निम्बुखेडाकी १३ वर्षीया निर्मला पन्तलाई साउन ११ गते अज्ञात पक्षले बलात्कारपश्चात हत्या गरेको भन्दै कञ्चनपुरमा तीन दिनदेखि आन्दोलन भइरहेको छ ।
साउन १० गते मध्यान्ह १२ बजेतिर घरबाट साथीको घर जाने भनेर निस्केकी निर्मलाको शव भीमदत्त नपा- १८ उखुवारीमा साउन ११ गते फेला परेको थियो ।