निर्मला हत्या घटनामा संलग्न भएको आरोपमा दिलिप विष्टलाई सार्वजनिक गरेपछि वास्तविक दोषीलाई प्रहरीले उम्काउन खोजेको आरोपमा पीडित परिवार र स्थानियबासीहरूले भदौ ६ गते नाराबाजी गर्दै महेन्द्रनगर बजार बन्द गरेका छन् ।
पीडित पक्षले मानसिक सन्तुलन नभएको व्यक्तिलाई गिरफ्तार गरी सार्वजनिक गरेर वास्तविक दोषीलाई उम्काउन खोजेको आरोपमा आन्दोलनको आह्वान गरेको आन्दोलनकारीले जनाएका छन् ।
प्रदर्शनपछि महेन्द्रनगर बजार पूर्ण रूपमा बन्द रहेको छ भने सार्वजनिक यातायात, शिक्षण संस्थाहरू सञ्चालन हुन सकेका छैनन् । बजार, वित्तीय संस्था र सार्वजनिक यातायात बन्द भएका कारण सर्वसाधारणको जनजीवन प्रभावित भएको छ ।
आन्दोलनकारीले बजारका चोक–चोकमा भेला भएर टायर बाल्दै प्रदर्शन गरेका थिए । आन्दालनकारीहरूले जिल्ला प्रशासन कार्यालय र वडा प्रहरी कार्यालय घेराउ गरी प्रदर्शन गर्न खोज्दा प्रदर्शनकारीलाई तितरवितर गर्न प्रहरीले अश्रु ग्यास प्रहार गरेको जनाएको छ ।
प्रदर्शनको पहिलो दिन भदौ ५ गते प्रदर्शनकारी र प्रहरीबिच भएको झडपमा भीमदत्त नपा–१८ की मञ्जु गिरी गम्भीर घाइते भएको जनाइएको छ ।
उनको उपचार महाकाली अञ्चल अस्पताल महेन्द्रनगरमा गरिएको छ । भीमदत्त नपा–२ निम्बुखेडाकी १३ वर्षीया निर्मला पन्तलाई साउन ११ गते अज्ञात पक्षले बलात्कार पश्चात हत्या गरेको अवस्थामा फेला परेकी थिइन् ।
साउन १० गते मध्यान्ह १२ बजेतिर घरबाट साथीको घर जाने भनेर निस्केकी निर्मलाको शव भीमदत्त नपा– १८ उखुवारीमा साउन ११ गते फेला परेको थियो ।