नेपाल मानव अधिकार वर्ष पुस्तक २०२६ का लागि सङ्कलन गरिएका मानव अधिकार उल्लङ्घन तथा ज्यादतिका घटनाहरूको प्रकाशन पूर्व वार्षिक समीक्षा कार्यक्रम ०८२ पुस ३ गते सम्पन्न भएको छ ।
इन्सेक जुम्ला प्रतिनिधि मानदत्त रावलले ०८१ पुस १७ गतेदेखि ०८२ पुस २ गतेसम्म सङ्कलन गरिएका १६ ओटा घटना समीक्षा कार्यक्रममा प्रस्तुत गर्नु भएको छ । जसमा सार्वजनिक सम्पत्ति तोडफोडका ६ ओटा, महिला बालबालिका सम्बन्धी बलात्कार, घरेलुहिंसाका घटना पाँच वटा, जातीय विभेदका दुई ओटा, स्वास्थ्य अधिकार एक ओटा, जेनजी आन्दोलनमा आगजनी तोडफोड एक ओटा र स्याउ बीमा सम्बन्धी एक वटा गरी १६ ओटा घटना रहेका छन् । पछिल्ला दुई वर्षको अवधिमा जिल्ला भरका हिंसामा परेका १० जना महिला तथा बालबालिकालाई कानुनी प्रक्रियामा जानका इन्सेकले सहयोग गरेको उहाँले जानकारी दिनुभयो ।
जिल्ला प्रहरी कार्यालय जुम्लाका डिएसपी रविन बाबु रेग्मीका अनुसार बालविवाहका घटना गाउँबस्तीमा हुने गरेपनि उजुरीको रुपमा प्रहरीमा आउने गरेका छैनन् । जसले गर्दा कारवाही प्रक्रियामा लैजान असहज भएको छ ।
राष्ट्रिय मानव अधिकार आयोग कर्णाली प्रदेश शाखा कार्यालय जुम्लाकी प्रमुख कल्पना नेपाल आचार्यले आयोगले निष्पक्ष रूपमा मानव अधिकारको क्षेत्रमा काम गर्दै आएको बताउनु भयो । पहुँचविहीन वर्गका लागि अझ सक्रिय भएर काम गरिरहेको उल्लेख गर्दै उहाँले मानव अधिकारको क्षेत्रमा इन्सेकले राम्रो भूमिका खेलेको बताउनु भयो । जुम्लामा महिला हिंसाका घटना बढी हुने गरेको उल्लेख गर्दै उहाँले महिलालाई दोस्रो दर्जाका रूपमा नहेर्न आग्रह गर्नुभयो । मानव अधिकारका दृष्टिले सबै नागरिक समान हुने उहाँको भनाइ छ ।