नेपाल मानव अधिकार वर्ष पुस्तक २०२६ का लागि संकलन गरिएका मानव अधिकारसँग सम्बन्धित घटनाहरूको प्रकाशन पूर्व वार्षिक समीक्षा कार्यक्रम ०८२ पुस १ गते सम्पन्न गरिएको छ । अनौपचारिक क्षेत्र सेवा केन्द्र (इन्सेक) रुकुमपश्चिम जिल्लाको आयोजनामा जिल्ला समन्वय समिति रुकुम पश्चिमको सभाहलमा पूर्व समीक्षा कार्यक्रम समपन्न गरिएको हो ।
मानव अधिकार वर्ष पुस्तक २०२६ का लागि जिल्लामा संकलन गरिएका मानव अधिकार उल्लङ्घन तथा ज्यादतिका ६८ ओटा घटनाहरु इन्सेकले अभिलेख गरेको इन्सेक प्रतिनिधि जीवन खड्काले कार्यक्रममा प्रस्तुत गर्नु भएको थियो ।
कार्यक्रमका प्रमुख अतिथि जिल्ला समन्वय समितिका निमित्त प्रमुख देवबहादुर बिकले मानव अधिकारको अभिलेख र अधिकारको अभियानमा इन्सेकको महत्वपूर्ण भूमिका रहेको बताउँदै बदलिँदो समयसँगै मानव अधिकार उल्लङ्घनका घटनाहरुको स्वरुप पनि परिवर्तन भएकोले त्यसमा ध्यान दिन जरुरी रहेको बताउनु भयो ।
सहायक प्रमुख जिल्ला अधिकारी केशव प्रसाद ओलीले आफ्नो अधिकारको लागि बहस पैरवी गर्दा अरुको अधिकारको पनि ध्यानदिनुपर्नेमा जोड दिनुभयो ।
नेकपा एमाले जिल्ला कमिटी उपसचिव ब्युझना देवकोटा पुनले मानव अधिकारको विषय सबैको साझा सरोकार भएकोले यसको संरक्षणमा सबै पक्षको सहभागिता आवश्यक रहेको बताउनु भयो ।
नेपाली कम्युनिष्ट पार्टीका जिल्ला संयोजक गोबिन्द रोकाले झिना मसिना कुरामा नअल्झिएर न्याय र समानताको पक्षमा लाग्नुपर्ने भन्दै त्यसैबाट मानव अधिकारको संरक्षण हुने कुरामा जोड दिनुभयो ।
नेपाली काँग्रेस रुकुमका उपसभापति हर्क सिंह खत्रीले मानव अधिकार उलंघनका आधारभुत तहका जनताको अधिकार रक्षाका लागि घटना संकलन र प्रकाशन कार्यले राम्रो खबरदारी गरेको भन्दै अधिकार संरक्षणमा निरन्तर खवरदारी र सचेतना अझै आवश्यक रहेको बताउनु भयो ।
कार्यक्रममा घटनाको तथ्यपरक सङ्कलन र पीडितलाई न्याय दिन पहल गर्न तथा पीडितहरुको सामाजिक अधिकारको सुनिश्चितता गर्नुपर्नेमा सहभागीहरुको सुझाव दिएका थिए ।
