११५ औँ अन्तर्राष्ट्रिय नारी दिवसको अवसरमा अन्तर्राष्ट्रिय महिला दिवस मूल समारोह समिति गण्डकी प्रदेश पोखराको आयोजनामा प्रभातफेरी कार्यक्रम सम्पन्न भएको छ ।
पोखराको जिरो किलोमिटरबाट सुरु भएको प्रभातफेरी कार्यक्रम पृथ्वीचोकमा पुगेर समापन गरिएको थियो । कार्यक्रममा गण्डकी प्रदेश सरकारका सामाजिक विकास, युवा तथा खेलकुद मन्त्री विन्दु कुमार थापाले विशेष सम्बोधन गर्दै महिला आन्दोलनले विश्वभर ल्याएको परिवर्तन एवं प्राप्त उपलब्धिहरूलाई संस्थागत गर्दै अगाडि बढ्नुपर्ने आवश्यकतालाई औंल्याउनुभयो ।
गण्डकी प्रदेश सरकार, इन्सेक, नौलो घुम्ति, राइट फर चिल्डेन, एकता महिलासमूह लगायतको आयोजनामा प्रभातफेरि कार्यक्रम गरिएको थियो । प्रभातफेरिपछिको कोणसभालाई सम्बोधन गर्दै मन्त्री थापाले नेपालमा दशकौँ लामो राजनीतिक आन्दोलनको परिणामस्वरूप महिला सशक्तीकरणको क्षेत्रमा उल्लेखनीय उपलब्धिहरू हासिल भएको बताउनुभयो । संविधानमार्फत महिला सहभागिता र प्रतिनिधित्व सुनिश्चित गर्न गरिएका कानूनी व्यवस्थाहरूको चर्चा गर्दै उनले मुलुकका तीनै तहका सरकार, संसद्, र नीति निर्माणका निकायमा महिलाको नेतृत्वदायी भूमिका सुदृढ भएको उल्लेख गर्नुभयो ।
‘पछिल्ला वर्षहरूमा नेपालले लैङ्गिक समानताका विभिन्न सूचकहरूमा प्रगति गरिरहेको छ । यसलाई थप परिणाममुखी बनाउन महिला सशक्तीकरण, आर्थिक, सामाजिक र संरचनात्मक रुपान्तरण अति आवश्यक छ,’ उहाँले भन्नुभयो ।
मन्त्री थापाले स्वदेशमा महिलाहरू समान कामका लागि समान पारिश्रमिक नपाउने, महिला भएकै कारण हिंसामा पर्ने, रोजगारीका लागि विदेशिनुपर्ने जस्ता समस्या विद्यमान रहेको उल्लेख गर्दै यी समस्याहरू समाधान गर्न कानूनी, नीतिगत, र व्यवहारिक सुधारहरू आवश्यक रहेको बताउनुभयो ।
महिला सशक्तीकरण, सहभागिता र समानताको विषय केवल महिलासँग सम्बन्धित नभई सबैका लागि सरोकारको विषय भएको उहाँको भनाइ छ । उहाँले महिला अधिकार सुनिश्चित गर्न, प्रभावकारी कानूनी सुधार र नीतिहरू लागू गर्ने गरी प्रदेश सरकार अगाडि बढेको जानकारी गराउनुभयो ।
महिलाहरूका लागि उद्यमशीलता, स्वरोजगार, र सीप विकास कार्यक्रमहरू सञ्चालन गरी महिला उद्यमीहरूलाई सहुलियतपूर्ण ऋण, अनुदान, र बजार पहुँच सुनिश्चित गर्ने बाटोमा प्रदेश सरकार अग्रसर रहेको उहाँले बताउनुभयो ।
बालिका शिक्षामा जोड दिँदै उनले शैक्षिक संस्थामा लैङ्गिक मैत्री वातावरण निर्माण गर्ने तथा प्राविधिक शिक्षा र व्यावसायिक तालिममार्फत महिलाहरूलाई आत्मनिर्भर बनाउने प्रतिबद्धता जनाए । साथै, गर्भावस्था, प्रसूति, र मानसिक स्वास्थ्य सेवामा विशेष ध्यान दिँदै महिलामैत्री स्वास्थ्य सेवा विस्तार गरिने बताउनुभयो ।
कार्यक्रममा राष्ट्रिय मानव अधिकार आयोग पोखराका प्रमुख नितु गड्तौलाले समानता र महिला अधिकार प्रत्याभूत हुने कुरामा सबैको जोड हुनुपर्ने आवश्यकतालाई औंल्याउनुभयो ।
कार्यक्रममा सुरक्षाकर्मी, मानव अधिकारकर्मी, सामाजिक अभियन्ता र विभिन्न संघसंस्थाका प्रतिनिधिहरूको उपस्थिति रहेको थियो ।