अनौपचारिक क्षेत्र सेवा केन्द्र (इन्सेक) मधेस प्रदेश कार्यालयद्वारा गठित मानव अधिकार सहायता कक्षले बलात्कार घटनाकी पीडितलाई न्यायिक प्रक्रियामा सहयोगका लागि ०८१ पुस ५ गते आर्थिक सहायता प्रदान गरेको छ ।
बोल्न नसक्ने १५ वर्षीया बालिकालाई ०८१ पुस १ गते बलात्कार गरेको आरोपमा गौशाला नगरपालिका–७ जमुनियाका ५५ वर्षीय गेन कुमार चौधरीविरुद्ध पुस २ गते पीडित पक्षले इलाका प्रहरी कार्यालय गौशालामा उजुरी दिनुभयो ।
आरोपितले पुस १ गते पीडित बालिकालाई ललाई फकाई गाउँ नजिकै रहेको धान खेतमा लगि बलात्कार गरेको पीडित पक्षले बताउनु भयो ।
पीडित बालिकाको स्वास्थ्य परीक्षण पुस २ गते प्रादेशिक अस्पताल जलेश्वरमा भयो ।
उजुरी लगत्तै आरोपितलाई गाउँबाट गिरफ्तार गरेको इलाका प्रहरी कार्यालय गौशालाका इन्स्पेक्टर सूर्य राना मगरले जानकारी दिनुभयो ।
पीडितको आर्थिक अवस्था कमजोर रहेको र न्यायीक प्रक्रिया सहयोग पुग्ने उद्देश्यले पीडित पक्षलाई आर्थिक सहयोग प्रदान गरेको इन्सेक मधेस प्रदेश संयोजक राजु पासवानले बताउनु भयो ।
पीडित पक्षले आर्थिक सहयोग र न्यायीक प्रक्रियामा सहजिकरणका लागि इन्सेक महोत्तरी प्रतिनिधि मार्फत इन्सेक मधेस प्रदेश कार्यालयमा निवेदन दिनु भएको थियो ।