नेपाल मानव अधिकार वर्ष पुस्तक २०२५ प्रकाशन पूर्व रोल्पामा अर्ध वार्षिक समीक्षा कार्यक्रम ०८१ असार १६ गते सम्पन्न भएको छ । कार्यक्रममा इन्सेक जिल्ला प्रतिनिधिले सन् २०२४ को जनवरीदेखि जुनसम्म सङ्कलन भएका मानव अधिकार उल्लङ्घनका २२ ओटा घटनाहरू प्रस्तुत गर्नु भएको थियो ।
जसमा बलात्कारका चार ओटा, हत्याका दुई ओटा र घरेलु हिंसाबाट १६ जना पीडित रहेको इन्सेकले अभिलेख गरेको छ । हरेक वर्ष इन्सेकले प्रकाशन गर्ने नेपाल मानव अधिकार वर्ष पुस्तक अन्तर्गत वर्ष पुस्तक २०२५ मा जिल्लाको समग्र मानव अधिकारको अवस्थाको चित्रण झल्किनुपर्नेमा मानव अधिकारकर्मी खेम बुढामगरले जोड दिनुभयो ।
कार्यक्रममा बोल्दै इन्केकका साधारण सदस्य घनस्याम आचार्यले वर्ष पुस्तकमा रोल्पाको रिपोर्टलाई उत्कृष्ट बनाउन इन्सेकले गरेका हरेक गतिविधिहरूमा सबै सरोकारवालाहरूले पनि साथ दिनुपर्ने बताउनु भयो । उहाँले केही छुटेका घटनाहरू पुन सङ्कलित गरी वर्ष पुस्तकमा समाबेस गरिने बताउनु भयो ।
हाल जिल्लामा मानव अधिकारका घटनाहरूमा उल्लेखिय वृद्धि नदेखिएको र मानव अधिकारसम्बन्धी घटनामा कमि ल्याउन सबै पक्षले भूमिका खेल्नुपर्ने जिल्ला प्रहरी कार्यालयका इन्स्पेक्टर रोहितकुमार शाहीले बताउनु भयो ।
