बारामा यस वर्ष ५५ ओटा मानव अधिकार उल्लङ्घन तथा ज्यादतीका घटना अभिलेख गरिएको प्रतिवेदन अनौपचारिक क्षेत्र सेवा केन्द्र (इन्सेक) बाराले एक कार्यक्रमको आयोजना गरी सार्वजनिक गरेको छ ।
कलैयास्थित बारा उद्योग वाणिज्य सङ्घको सभा हलमा मङ्सिर ९ गते आयोजित नेपाल मानव अधिकार वर्ष पुस्तक-२०१९ का लागि सङ्कलित घटनाहरूको प्रकाशन पूर्व वार्षिक समीक्षा कार्यक्रममा इन्सेक बारा जिल्ला प्रतिनिधि भोलानाथ पौडेलले मानव उल्लङ्घनका घटनाहरूको तथ्याङ्क प्रस्तुत गरेका थिए ।
प्रस्तुत प्रतिवेदन अनुसार ११ ओटा हत्या, दुई ओटा बालविवाह, १२ ओटा बालयौन दुर्व्यवहार, १५ ओटा महिला हिंसाका घटना, तीन ओटा बहुबिबाह, एउटा हत्याको प्रयास र तीन ओटा आक्रमणका घटना छन् ।
कार्यक्रममा जिल्ला प्रशासन कार्यालय बाराका प्रशासकीय अधिकृत शेरबहादुर थापाले वर्ष पुस्तक मानव अधिकारको दस्तावेज भएकाले केही घटना छुटेको हुन सक्ने भन्दै घटनाहरू नछुटाउन सुझाव दिए ।
राष्ट्रिय अनुसन्धान कार्यालय बाराका उपसचिव विमल घिमिरले पिछडिएको समुदायको हक अधिकारलाई नेपाल मानव अधिकार वर्ष पुस्तकमा प्राथमिकताका साथ राख्नु पर्ने सुझाव दिए । जिल्ला प्रहरी कार्यालय बाराका डिएसपी रञ्जितसिंह राठौरले प्रतिवेदन हेरेर सुझव दिने बताए ।
भोलानाथ पौडेल