नागरिक समाज र स्थानीय तहको भूमिकाको बारेमा इन्सेकले रामेछापका सरोकारवालासँग छलफल गरेको छ ।
पारस्परिक जबाफदेहिता कार्यक्रमका संयोजक श्रीराम बजागार्इँले असोज ९ गते जिल्लाका पत्रकार, नागरिक समाजका अगुवा तथा निर्वाचित जनप्रतिनिधिहरूसँग समेत भेटघाट गरी नागरिक समाज र स्थानीय तहको भूमिकाको बारेमा छलफल गरेका थिए ।
छलफलका क्रममा पत्रकारहरूले देशमा हालै जारी भएको देवानी र फौजदारी संहिताको बारेमा निर्वाचित जप्रतिनिधि तथा नागरिकलाई पनि ज्ञान नहुँदा समस्या आएको बताए ।
उनीहरूले निर्वाचित जनप्रतिनिधिहरू अझै पनि नागरिकहरूको बिचमा घुलमिल हुन नसकेका तथा नागरिकको अपेक्षा अनुसार काम गर्न नसकेका बताए ।
कार्यक्रममा नागरिक समाजका अगुवाहरूले जनप्रतिनिधि र नागरिक समाजबिचको सम्बन्ध जुन हिसावले सुमधुर हुनुपर्ने त्यस्तो हुन नसकेको बताए ।
नागरिक समाजलाई निर्वाचित जनप्रतिनिधिहरूले प्रतिपक्षको व्यवहार गर्ने गरेको नागरिक अगुवाहरूको गुनासो थियो ।
छलफलको क्रममा मन्थली नगरपालिकाकी उपप्रमुख माया कार्कीले नागरिक संस्थाहरूको बारेमा केन्द्र र स्थानीय सरकारकाबिच अस्पष्टताकै कारण अन्योलता रहेको बताइन् ।
नवराज पथिक