नेपाल मानव अधिकार वर्ष पुस्तक २०१८ का लागि सङ्कलित घटनाको प्रकाशन पूर्व अर्धवार्षिक समीक्षा कार्यक्रम असार १६ गते राजविराजमा सम्पन्न भएको छ ।
अनौपचारिक क्षेत्र सेवा केन्द्र (इन्सेक) सप्तरीद्वारा सन् २०१७ को घटनालाई समेटेर नेपाल मानव अधिकार वर्ष पुस्तक-२०१८ प्रकाशन गर्ने क्रममा प्राप्त सुझावलाई समेटने उद्देश्यले २०१७ जनवरीदेखि जुनसम्म सङ्कलित घटनाबारे जानकारी गराउँदै पूर्व समीक्षा कार्यक्रम आयोजना गरिएको हो ।
मानव अधिकारको प्रत्यक्ष र अप्रत्यक्ष सरोकार राख्ने घटनाहरूबारे समीक्षा गरिएको कार्यक्रममा इन्सेक प्रतिनिधि मनोहरकुमार पोखरेलले ६ महिनामा सङ्कलित मानव अधिकार उल्लङ्घन तथा ज्यादतीका ९० घटनाबारे प्रतिवेदन प्रस्तुत गरेका थिए ।
मानव अधिकार उल्लङ्घन एवम् ज्यादतीका घटनामा यस अवधिमा राज्यद्वारा पाँचजनाको हत्या हुनुका साथै बालिका बलात्कार र घरेलु हिंसाको घटना धेरै भएको उल्लेख छ । संयुक्त लोकतान्त्रिक मधेसी मोर्चा र राजपाको आन्दोलनका कारण यस अवधिमा भौतिक सम्पति र संरचनाहरूमा क्षति पुगेको तथा अभिव्यक्ति, भेला हुने र सङ्गठित हुने अधिकारमा समेत अवरोध पुगेको प्रतिवेदनमा उल्लेख छ ।
मनोहरकुमार पोखरेल