१७ वर्षीया बालिकालाई बलात्कार गरेको कसुरमा जिल्ला अदालतले दंगीशरण गाउँपालिका–५ का २७ वर्षीय हिमराज खत्री भन्ने हेमराज केसीलाई सात वर्ष कैद सजायको फैसला गरेको छ ।
जिल्ला न्यायाधिश तेजनारायण पौडेलको जेठ २१ गतेकाे इजलासले आराेपितलाई कसुरदार ठहर गर्दै सात वर्ष कैद, ३ लाख जरिबाना, ४० हजार रुपियाँ क्षतिपूर्ति र १ हजार ३ सय रुपियाँ पीडित राहत कोषमा जम्मा गर्ने फैसला गरेको अदालतका स्रेस्तेदार दामोदर घिमिरेले जानकारी दिनुभयो ।
केसीले बालिकालाई ०८१ असार २९ गते बलात्कार गरेको भन्दै पीडित पक्षले असार ३० गते इलाका प्रहरी कार्यालय तुलसीपुरमा उजुरी दिएका थिए । पीडितको स्वास्थ्य परीक्षण असार ३० गते राप्ती प्रादेशिक अस्पताल तुलसीपुरमा भएको थियो । प्रहरीले आरोपितलाई असार ३० गते घरबाटै गिरफ्तार गरी साउन २१ गते बलात्कार सम्बन्धी मुद्धा चलाएको थियो ।