पाथीभरा मुकुम्लुङ क्षेत्रमा केवलकार निर्माणको खारेजीको माग गर्दै आएको नो केवलकार समूहलाई सरकारले वार्ता बोलाएपछि आन्दोलनरत पक्षले वार्ताका बस्नका लागि चार ओटा सर्त अघि सारेको छ ।
मुकुम्लुङमा दिगो, शान्ति, सार्थक र परिणाममुखी वार्ताका लागि सङ्घर्षरत पक्षबाट वार्ताको वातावरण तय गर्न आन्दोलनरत पक्षले फागुन १३ गते विज्ञप्तिमार्फत सरकारसँग शर्त राखेको छ ।
सर्तहरुमा मन्त्रीस्तरीय वार्ता समिति निर्माण गरी आन्दोलनरत पक्षलाई आधिकारिक पत्राचार गर्नु पर्ने, आन्दोलनका क्रममा ताप्लेजुङ, सुनसरी लगायत स्थानबाट पक्राउ गरिएकाहरूलाई निशर्त रिहाइ गर्नुपर्नेलगायतका सर्त छन् ।
केवलकार निर्माण कार्य बन्द गरी निर्माण स्थलबाट सामग्री, ठेकेदार, कामदार र मजदुर फिर्ता गर्नु पर्ने, पाथीभरा मुकुम्लुङ क्षेत्रबाट सशस्त्र प्रहरी फिर्ता हुनुपर्ने सर्त छन् ।
गृह मन्त्रालयले फागुन १३ गते आन्दोलनरत पक्षलाई वार्तामा आउन आग्रह गरेको थियो ।
केवलकार निर्माणको क्रममा उत्पन्न समस्या र विवादलाई वार्ता र सम्वादको माध्यमबाट समस्याको शान्तिपूर्ण समाधानका लागि ०८१ माघ २२ गृह मन्त्रालयद्वारा वार्ता टोली गठन गरिएको थियो ।
निर्माणस्थलबाट जेसीभी फिर्ता
सरकारद्वारा गठित वार्ता समितिले तत्काल निर्माण कार्य स्थगित गरी वार्ताका लागि आन्दोलनरत पक्षलाई बोलाएपछि केवलकार निर्माणस्थल काफ्लेपार्टीबाट निर्माण कार्यमा प्रयोग गरिएको जेसीभी फिर्ता ल्याइएको छ । तोडफोड हुन सक्ने भएकाले काफ्लेपाटी क्षेत्रमा प्रहरीले जेसीभीलाई सुरक्षा निगरानीमा राखेको छ ।
उपद्रव मच्चाएको आरोप थप दुई गिरफ्तार
पाथीभरामा निर्माणाधीन केबलकार विवादको झडपमा आपराधिक उपद्रव र हुलदङ्गा गरेको आरोपमा प्रहरीले थप दुई जनालाई गिरफ्तार गरेको छ ।
पाँचथर याङवरक गाउँपालिका-२ की ४३ वर्षीया इन्दिरा धौराली र फक्ताङलुङ गाउँपालिका-५ का ३७ वर्षीय सुवास तुम्बाहाङफेलाई प्रहरीले गिरफ्तार गरेको हो । फुङलिङ बजारको वीरेन्द्रचोकमा फागुन १० गते भएको झडपमा आपराधिक उपद्रव र हुलदङ्गा गरेको अभियोगमा प्रहरीले दुई जनालाई गिरफ्तार गरेको हो ।
फागुन १२ गते फुङलिङ नगरपालिका ४ बाट धौराली र तुम्बाहाम्फेलाई अनुसन्धानका लागि गिरफ्तार गरिएको जिल्ला प्रहरी कार्यालयका डिएसपी रवि रावलले बताउनु भएको छ ।