आठ वर्षीया बालिकालाई बलात्कार गरेको आरोपमा हिरासतमा रहेका सशस्त्र प्रहरी २९ नं. ज्वालामाइ गण भालुवाङमा कार्यरत प्रहरी जवान २६ वर्षीय रेवन पचभैया मगरको वडा प्रहरी कार्यालय, घोराहीमा मृत्यु भएको छ ।
हिरासतभित्र रहेको शौचालयको भेन्टिलेटरमा आफैले लगाएको गञ्जी र टि–शर्टको प्रयोग गरी झुण्डिएको अवस्थामा कात्तिक १२ गते फेला परेको जिल्ला प्रहरी कार्यालयका एसपी अर्जुनकुमार तिमिल्सिनाले जानकारी दिनुभयो । प्रहरीले परिवारको रोहवरमा शव निकालेर कात्तिक १२ गते राप्ती स्वास्थ्य विज्ञान प्रतिष्ठान, घोराहीमा पोष्टमार्टम गरी परिवारलाई जिम्मा लगाएको छ ।
दशैको पिङ खेल्न गएकी आठ वर्षीया बालिकालाई ०८१ असोज २४ गते बलात्कार गरेको आरोपमा २९ नंं ज्वालामाई गणमा कार्यरत प्रहरी जवान पचभैया मगर र सहायक हवल्दार ३० वर्षीय भरत रोका मगरलाई प्रहरीले कात्तिक ९ गते गिरफ्तार गरेको थियो । बालिका बलात्कार भएको सात दिनपछि उजुरी लिएको प्रहरीले आरोपितको खोजीमा आनाकानी गरेको भन्दै स्थानीयहरूको सर्वपक्षीय भेलाले कात्तिक ३ गते राप्ती उद्योग वाणिज्य सङ्घका अध्यक्ष सुरज खड्काको संयोजकत्वमा १८ सदस्यीय सङ्घर्ष समिति गठन गरेका थिए ।
सङ्घर्ष समितिले घटनाका आरोपितको संरक्षण गर्न थालेको भन्दै कात्तिक ५ गते राजमार्ग बन्द गर्दै आन्दोलनको घोषणा गरेको थियो । इन्सेकलगायत मानव अधिकारसम्बन्धी संस्थाहरूले कात्तिक ५ गते घटनाको विरोध गर्दै दोषीलाई तत्काल गिरफ्तार गरी कारवाही गर्न माग गरेका थिए । स्थानीयले सङ्घर्ष समितिसहित कात्तिक ६, ७ र ८ गते स्थानीय बजार बन्द, पूर्वपश्चिम राजमाग अवरुद्ध गरेपछि नेपाल प्रहरीको केन्द्रीय अनुसन्धान ब्यूरो (सिआइवी) को सहयोगमा प्रहरीले सशस्त्रका जवान र सहायक हवलदारलाई कात्तिक ९ गते गिरफ्तार गरेको थियो ।