१४ वर्षीया बालिकालाई आर्थिक प्रलोभन देखाएर बन्धक बनाइ बेचबिखनको प्रयास गरेको आरोपमा प्रहरीले लमजुङ घर भई पोखरा महानगरपालिका–१६ बस्ने २२ वर्षीया सरु बिक, सोही ठाउँकी ३४ वर्षीया भगवती अधिकारी र ३१ वर्षीय चिनिया नागरिक जि मिङ चेनलाई साउन २९ गते गिरफ्तार गरेको छ ।
बालविवाह र बन्धक बनाएको भएपनि प्रहरीले बेचबिखन तथा ओसारपसारको कसुरमा आरोपितहरूलाई अनुसन्धान गरेको जनाएको छ ।
चिनिया नागरिकसँग विवाह गराइदिएको आरोपमा चिनियाँ नागरिक एक जना र विवाह गराइदिने दुई जनालाई गिरफ्तार गरिएको जिल्ला प्रहरी कार्यालय कास्कीका डिएसपी बसन्तकुमार शर्माले बताउनु भएको छ ।
साउन १३ गते यी दुई महिलाले ती बालिकालाई फकाएर पोखरा विन्ध्यावासीनी मन्दिरमा विवाह गराइदिएको पीडित बालिकाले साउन २९ गते दिएको उजुरीमा उल्लेख गरेकी छन् । विवाहपछि लेकसाइड होटलमा पु¥याएपछि सोही रात बालिका भागेर काठमाडौँ पुगेकी प्रहरीले जनाएको छ । बालिका पोखरा आएर साउन २९ गते मात्र उजुरी दिएकी हुन् ।
बिक र अधिकारीले चेनसँग आर्थिक लाभ लिई ती बालिकासँग विवाह गराइदिएको प्रहरीले जनायो । चिनिया नागरिक चेन ९० दिनको भिजिट भिसामा नेपाल आएको पनि प्रहरीले जानकारी दिएको छ ।