धादिङ सदरमुकाम धादिङबेसीमा दुई महिनादेखि खाने पानीको अभाव भएको छ । शुद्ध पिउने पानी नागरिकको नैसर्गिक अधिकार भएपनि सदरमुकाम धादिङबेसीमा दुई महिनादेखि खाने पानीको अभाव भएको हो ।
उपभोक्ताहरूको घरघरमा पानी वितरण गर्ने गरि निर्वाचित उपभोक्ता समिति समेत नगरपालिकाले निष्क्रिय बनाएपछि खाने पानी व्यवस्थापनमा दुई महिनादेखि समस्या आएको हो ।
धादिङबेसी पुछारबजार क्षेत्रमा दुई महिनाभन्दा बढी समयदेखि उपभोक्ताको धारामा पानी आउन छाडेको छ । घरमा पानी नआए पछि उपभोक्ताहरूलाई पानी खरिद गरी दैनिकी चलाउनुपर्ने अवस्थामा पुग्दासमेत नगरपालिका र खानेपानी उपभोक्ता समितिको कार्यालले चासो देखाएका छैनन् ।
खाने पानीको अभाव हुँदा उपभोक्ताहरू आक्रोशित मात्र छैनन् विभिन्न चरणमा आन्दोलसमेत गरिरहेका छन् ।
नीलकण्ठ नगरपालिका –३ मा एमाले चोकदेखि बसपार्क, दूरसञ्चार चोक, गणेशमार्ग क्षेत्र आदीमा पानी आउन छाडेको विषयमा उपभोक्ताहरुले खानेपानी उपभोक्ता समिति र नीलकण्ठ नगरपालिकामा जानकारी गराएपनि बेवास्ता गरेको उपभोक्ताहरुको गुनासो छ । यस क्षेत्रमा नियमित पानी नआएको एक वर्ष भन्दा बढी भएपनि दुई महिनादेखि भने पानी आउनै छाडेको उपभोक्ता लालकाजी श्रेष्ठले बताउनु भयो ।
खानेपानी अभावले कयौँ दिन खाना बनाउन नपाएको, नियमितरुपमा लुगा धुन नपाएर विद्यार्थीहरू मैलो लुगा लगाएर विद्यालय जानु परेको यसक्षेत्रका उपभोत्ताहरुको भनाइ छ ।
पानी नआएको विषयमा सम्बन्धित निकाय, खानेपानी उपभोक्ता समितिलाई पटक पटक जानकारी दिँदा समेत बेवास्ता गरेको उपभोक्ता श्रेष्ठले बताउनु भयो ।
‘करिब २ हजार घर धुरीमा पानी आउन छाडेको छ । घरभित्र पानी नआएको त वर्षदिन भयो । घर बाहिर सानो पानी आउथ्यो तर अहिले पानी नआएपछि उपभोक्ताहरु समस्यामा परेका छन् ।,’–उपभोक्ता बालकृष्ण खत्रीले भन्नु भयो ।
धादिङबेसीको पुछारबजार क्षेत्रका केही घरमा थोरै पानी आउने र बोतलमा भरेर खानुपर्ने बाध्यता रहेको छ । सबैजसो उपभोक्ताले नियमित पानीको महशुल भुक्तानी नियमित गरे पनि समस्या पर्दा भने बेवास्ता गर्दै आएको उपभोक्ताहरूको गुनासो रहेको छ ।
सदरमुकाम आउने पानीको पाइप डढेलो लागेर फुटेको र बिचमा रहेको बस्तीका व्यक्तिहरूले पाइप फुटाएको पाइए पनि उपभोक्ता समितिले काम नगरेका कारण मुख्य बजारमा पानीको अभाव भएको नीलकण्ठ नगरपालिका–३ का वडा अध्यक्ष राजकुमार श्रेष्ठले बताउनु भयो ।
उपभोक्ता समितिलाई तीन वर्ष अघि नगरपालिकाले विघटन गरेको र उपभोक्ता समितिले आफू कायम रहन माग गर्दै उच्च अदालतमा मुद्दा दर्ता गरेकोमा हाल मुद्दा विचाराधीन रहेको अध्यक्ष श्रेष्ठले बताउनु भयो । अदालतले नगरपालिकालाई मुद्दा फैसला नहुन्जेल उपभोक्ता समिति विघटन नगर्न र काम गर्न दिन अन्तरिम आदेश दिएको थियो ।
