मिथिला विहारी नगरपालिका–३ घर भई जनकपुरधाम उपमहानगरपालिका–९, थापाचोक बस्ने २३ वर्षीया आरती साहको हत्या घटनाका आरोपित ५० वर्षीया सासु रेनु साहलाई ०८० चैत ४ गते जिल्ला प्रहरी कार्यालय धनुषाले गिरफ्तार गरेको छ ।
आरोपित सासुलाई उनकै छिमेकी विनय साहको घरमा लुकिछिपि बसेको अवस्थामा गिरफ्तार गरेको जिल्ला प्रहरी कार्यालयका सई सिकेन्द्रकुमार कामतले जानकारी दिनु भयो । साथै चैत ५ गते जिल्ला अदालतबाट सात दिनको म्याद थप गराइ घटना बारे थप अनुसन्सधान अगाडि बढाएको उहाँले बताउनु भयो ।
त्यस्तै सोही घटनका अर्का आरोपित आरती साहका देवर २७ वर्षीय रावि कुमार साहलाई फागुन २३ गते जिल्ला प्रहरी कार्यालयले गिरफ्तार गरेको थियो ।
आरती साहलाई ३२ वर्षीय पति मोतीवावु साह र ७० वर्षीय ससुरा मदनमोहन साह लगायत परिवारका सदस्यहरूले दाइजोका कारण ०८० जेठ ७ गते हत्या गरेको पीडित परिवारको आरोप छ । घटनाको निष्पक्ष छानविन गर्नुपर्ने माग गर्दै काठमाडौँमा ०८० असार १ गतेदेखि आन्दोलनरत पीडित परिवार र नेपाल सरकार, गृह मन्त्रालयबीच ०८० फागुन २९ गते ५ बुँदे सहमति भएको छ ।
उक्त सहमति पत्रमा आरतीको हत्या घटनाबारे नेपाल प्रहरीको केन्द्रीय अनुसन्धान ब्यूरो (सीआईबी) ले पुनः अनुसन्धान गर्ने भनि उल्लेख छ ।