सरकारले ०८० माघ १२ गते त्रिभुवन अन्तर्राष्ट्रिय विमानस्थल, अध्यागमन कार्यालयमा अध्यागमनका कर्मचारीलाई प्रहरीले कुटपिट गरेको घटनाबारे छानबिन गर्न तीन सदस्यीय छानबिन समिति गठन गरेको छ ।
प्रहरीले चेकजाँच गर्ने क्रममा विवाद हुँदा त्रिभुवन विमानस्थल अध्यागमन कार्यालय प्रमुख गोगनबहादुर हमाल र सोही कार्यालयका अधिकृत छायाँलाल मोक्तानमाथि माघ १२ गते कुटपिट गरेको आरोप छ ।
गृह मन्त्रालयका प्रवक्ता सहसचिव नारायणप्रसाद भट्टराईका अनुसार गृह मन्त्रालयका सहसचिव थानेश्वर गौतमको संयोजकत्वमा तीन सदस्यीय छानबिन समिति गठन गरिएको हो । छानबिन समितिलाई उक्त घटनाबारे सत्यतथ्य छानबिन गरी प्रतिवेदन पेश गर्न तीन दिनको समय तोकिएको छ ।