सशस्त्र द्वन्द्वमा बेपत्ता पतिको खोजिका लागि पहल गरिदिन इन्सेकलाई बलेफी गाउँपालिका-३ की लक्ष्मी न्यौपानेले आग्रह गर्नुभएको छ । बेपत्ता पति बिष्णुप्रसाद न्यौपानेको खोजिका लागि पहल गरिदिन ०८० साउन ३१ गते इन्सेक जिल्ला प्रतिनिधि समक्ष पुगि लक्ष्मी न्यौपानेले आग्रह गर्नुभएको हो ।
बेपत्ता बिष्णु न्यौपानेलाई माओवादी भएको आरोपमा ०६१ भदौ २९ गते काठमाडौँको कोटेश्वरबाट तत्कालिन शाही नेपाली सेनाले गिरफ्तार गरी लगेकोमा हालसम्म अवस्था अज्ञात रहेको पत्नी लक्ष्मी न्यौपानेले बताउनु भयो । मजदुरीका लागि काठमाडौँ गएका पति हालसम्म घर नफर्केको कारण खोजिका लागि पहल गरिदिन बेपत्ता परिवार लक्ष्मीको आग्रह छ ।
बेपत्ता पतिको खोजिका लागि यसभन्दा अघि धेरै पटक सदरमुकाम पुगेर विभिन्न निकायमा अनुरोध गरेको तर हालसम्म पत्ता लगाउन नसकेको उहाँको भनाइ छ ।
तत्कालिन युद्धरत पक्ष नेकपा माओवादीको सामान्य समर्थक भएपनि दुवै पक्षको चेपुवामा परेका कारणले घरमा बस्न नसकेर बिष्णुप्रसाद न्यौपाने मजुदुरीका लागि काठमाडौँ गएका थिए । काठमाडौँमा मजदुरी गरिरहेकै अवस्थामा न्यौपानेलाई सेनाले गिरफ्तार गरी लगेको लक्ष्मी न्यौपानेले बताउनु भयो ।
पतिको खोजिका लागि सरकारले गठन गरेको सत्य निरुपण तथा बेपत्ता आयोगमा निवेदन दिएको भएपनि सो आयोगले पतिको अवस्था बारे हालसम्म कुनै जानकारी नगराएको बेपत्ता पत्नी लक्ष्मी न्यौपानेको गुनासो छ ।
