राप्ती स्वास्थ्य विज्ञान प्रतिष्ठान, घोराहीको लापरवाहीका कारण को घोराही उपमनपा–३ का ११ वर्षीय आक्रोश नेपालीको उपचारको क्रममा असार २८ गते मृत्यु भएको छ । घटनाका विषयमा मृतक पक्षले बिरोध प्रदर्शन गरे पछि अस्पतालको सेवा अवरूद्ध भएको छ ।
छारे रोगका कारण असार २६ गते भर्ना भएका बालकको असार २८ गते विहान एमआरआई गर्न जाँदा बिरामीलाई ह्विलचेयर र अक्सिजन सिलिण्डरसहित लगेपछि ढोकाबाटै चुम्बकले तानेर एमआरआई मेसिनमा टाँसिएपछि चोट लागेर गम्भीर घाइते भएका बालकको असार २८ गते उपचारकै क्रममा मृत्यु भएको मृतककी फूपु सरिता नेपालीले जानकारी दिनुभयो ।
‘एमआरआई गर्ने मेसिनले ढोका खोल्नेवित्तिकै बिरामीसहित सिलिण्डर तानेर लाग्यो, त्यस्कै चोटले बिरामीको मृत्यु भयो । धातुजन्य वस्तु लैजान नहुने थाहा पाउँदा पाउँदै लापरबाही गरेर अक्सिजन सिलिण्डर लैजादा ज्यान गयो ।,’ –सरिताले भन्नु भयो ।
प्रतिष्ठानका रजिष्ट्रार प्रकाश थापाले एमआरआई गर्ने कोठामा सिलिण्डर लैजाने त्रुटि भएपनि सिलिण्डरले बिरामीलाई कुनै चोट नलागेको र छारे रोगका कारण बिरामीको मृत्यु भएको बताउनु भयो ।
मृतकका आफन्तले लापरवाहीले बालकको ज्यान गएको भन्दै असार २८ गतेदेखि विरोध प्रदर्शन गरिरहेका छन् । असार २९ गते प्रतिष्ठान घेराउ गरेका छन् भने घोराही लमही सडक खण्ड बिहान ११ बजेदेखि अवरुद्ध गरेर आन्दोलन गरिरहेका छन् ।
आन्दोलनका कारण प्रतिष्ठानको ओपिडी लगायतका सबै सेवा बन्द भएका छन् । अस्पतालमा भर्ना भएका बिरामीहरूको भने उपचार भइरहेको प्रतिष्ठानका रजिष्ट्रार थापाले जानकारी दिनुभयो ।
सहमतिका लागि असार २८ गते बसेको द्विपक्षीय बार्ता असफल भएपछि असार २९ गते पुनः वार्ता सुरू भएको छ । पीडित पक्षले क्षतिपूर्ति स्वरूप २५ लाख रूपियाँ माग गरेका छन् भने सहमति नहुँदासम्म मृतकको शव नउठाउने पीडित पक्षले जनाएको छ ।