दोस्रो चरणमा हुन गइरहेको असार १४ गतेको निर्वाचनलाई इमान्दारीका साथ जिम्मेवारी पूरा गर्न निर्वाचन आयुक्त सुधीरकुमार शाहले आग्रह गरेका छन् ।
असार ९ गते दार्चुला जिल्लाको निर्वाचनको गतिविधि, सुरक्षा अवस्थाको समग्र जानकारी लिन दार्चुला पुगेका शाहले निर्वाचनलाई भयरहित वातावरणमा सम्पन्न गर्न आग्रह गरेका हुन् ।
अनुगमनको सिलसिलामा पुगेको आयोगको टोलीले स्थानीय तहको निर्वाचनलाई निष्पक्ष, स्वतन्त्र, र भयरहित वातावरणमा सम्पन्न गर्न मुख्य निर्वाचन अधिकृत, निर्वाचन अधिकृतहरू र प्रमुख जिल्ला अधिकारी, जिल्ला निर्वाचन अधिकारी, जिल्लास्थित सुरक्षा निकाय प्रमुख तथा कर्मचारीहरूलाई निर्देशन दिएको छ ।
निर्वाचनलाई निष्पक्ष बनाउन निजामती कर्मचारी, सुरक्षा निकाय र स्थानीय प्रशासनबिचमा सञ्चार समन्वय हुन आवश्यक रहेको शाहले बताए । उनले निर्वाचनका क्रममा देखिने समस्याको समाधान गर्न पूर्वतयारीमा लाग्न जिल्ला सुरक्षा समितिलाई निर्देशन समेत दिएको जिल्ला प्रहरी कार्यालयका डिएसपी केदार खनालले जानकारी दिए ।
प्रमुख जिल्ला अधिकारी बासुप्रसाद कोइरालाले जिल्लाका १ सय २८ वटै मतदान केन्द्रको सुरक्षा व्यवस्था मजबुद बनाइएको जानकारी गराए । निर्वाचनको सुरक्षाका लागि जिल्लाभरी नेपाल प्रहरी, सशस्त्र प्रहरी, नेपाली सेना, राष्ट्रिय अनुसन्धान गरी १ हजार ७ सय सुरक्षाकर्मी परिचालन गरिएको जानकारी गराएका थिए ।