निर्वाचन विरोधी गतिविधिमा संलग्न रहेको आरोपमा विभिन्न जिल्लामा नेत्रविक्रम चन्द नेतृत्वको नेपाल कम्युनिष्ट पार्टीका कार्यकर्ता गिरफ्तार भएका छन् ।
इन्सेक धनकुटा जिल्ला प्रतिनिधि सन्तोष रुचालका अनुसार धनकुटामा जिल्ला अध्यक्षसहित तीन जनालाई गिरफ्तार गरेको छ ।
स्थानीय तहको निर्वाचनलाई बहिष्कार गर्दै आएको सो पार्टीले निर्वाचन विरोधी गतिविधि गरी शान्ति सुरक्षामा खलल पार्ने देखिएकाले जिल्ला अध्यक्ष ३८ वर्षीय आकाश शर्मा, सदस्य ४२ वर्षीय याम भनिने राजन अधिकारी र ३५ वर्षीय रणबहादुर राईलाई गिरफ्तार गरिएको जिल्ला प्रहरी कार्यालयका एसपी सुदिप राजभण्डारीले बताए ।
इन्सेक दाङ जिल्ला प्रतिनिधि जेएन सागरका अनुसार निर्वाचन गतिविधिलाई बिथोल्ने कार्यमा संलग्न रहेको आरोपमा प्रहरीले नेपाल कम्युनिष्ट पार्टीका कार्यकर्ता सुरज परियारलाई असार ५ गते राप्ती गाउँपालिका-१ भालुवाङबाट गिरफ्तार गरेको छ ।
उम्मेदवारहरूलाई फोनमार्फत धम्क्याउने कार्य गरेको आरोपमा परियारलाई गिरफ्तार गरी अनुसन्धान गरिएको जिल्ला प्रहरी कार्यालयमा एसपी धिरजप्रताप सिंहले बताए ।
यसैबिच नेपाल कम्युनिष्ट पार्टीले जिल्लाका अधिकांश उम्मेदवारहरूको घरमा राखेको कालो झण्डा प्रहरीले हटाएको छ । निर्वाचन बहिष्कारमा लागेको नेकपाले विरोध स्वरूप जिल्लाका उपमहानगरपालिका र नगरपालिकाका मेयर, उपमेयर तथा गाउँपालिकाका प्रमुख उपप्रमुखको घरमा असार ४ गते राति कालोझण्डा राखेका थिए । प्रहरीले ५ गते बिहानै सबै ठाउँबाट कालोझण्डा हटाएको एसपी धिरजप्रताप सिंहले बताए ।