देशका विभिन्न भागहरूमा राष्ट्रिय जनता पार्टीले दोस्रो चरणको स्थानीय निर्वाचनको विरोधमा आयोजना गरेको प्रदर्शन तथा जुलुसका क्रममा सुरक्षाकर्मीहरूद्वारा भएको बल प्रयोग र गिरफ्तारीप्रति राष्ट्रिय मानव अधिकार आयोगले ध्यानाकर्षण भएको जनाएको छ ।
‘स्वेच्छाचारी गिरफ्तारी नगर्न तथा शान्तिपूर्ण प्रदर्शनमा रहेका व्यक्तिहरूलाई दुर्व्यवहार नगर्न राष्ट्रिय मानव अधिकार आयोग सरकारको ध्यानाकर्षण गराउँदछ । सुरक्षाकर्मीहरूले हिजो शनिबार नवलपरासीको परासी बजारको बुद्धचोकमा राजपा नेपालद्वारा आयोजित कार्यक्रममा लाठीचार्ज, अश्रुँग्यास प्रहार तथा गोली प्रहार गर्दा ४ जना घाइते भएको तथ्य समेतबाट हामी गम्भीर भएका छौँ ।’-जारी विज्ञप्तिमा भनिएको छ ।
त्यस्तै नेपालगञ्ज, जनकपुर, सुनसरी, विराटनगरमा समेत गिरफ्तारीका सूचना प्राप्त गरेको उल्लेख गर्दै आयोगले सुरक्षाकर्मीहरूलाई अधिकतम संयमता अपनाउन आग्रह गरेको छ ।
‘आन्दोलनकारी दल राजपालाई समेत अन्य नागरिकको निर्वाचनमा भाग लिन पाउने अधिकारलाई समेत अवरोध नगर्न, राजनीतिक दलका प्रचार सामग्री जलाउने जस्ता कार्यसमेत नगर्न, निर्वाचनको कार्यक्रम नबिथोल्न र आफ्ना आन्दोलनका कार्यक्रमलाई शान्तिपूर्ण र अहिंसात्मक बनाउन आयोग आग्रह गर्दछ ।’-विज्ञप्तिमा उल्लेख छ ।