कोशी प्रदेश नामाकरण खारेजको माग गर्दै आन्दोलनरत प्रदेश न.१ पुन नामाङ्कन संयुक्त सङ्घर्ष समितिका कार्यकर्ता र प्रहरीबिच झापाको दमकमा वैशाख २६ गते साँझ भएको झडपमा प्रहरीको गोली लागी दुई जना घाइते भएका छन् ।
प्रहरीको गोली प्रहारबाट इलाम चुलाचुलीका गजेन्द्र फागो र झापा विर्तामोडकी निर्मला बराल लिङ्देन घाइते भएको सङ्घर्ष समिति झापा संयोजक दिपेनवाला राईले बताउनु भयो ।
प्रहरीको गोली प्रहारबाट फागोको घुडाँमा गोली लागेको र लिङ्देनलाई गोलीको छर्रा लागेको संयोजक राईले बताउनु भयो ।
घाइते दुवै जनाको झापाको विर्तामोडस्थित वि एण्ड सी अस्पतालमा उपचार भइरहेको छ ।
आन्दोलनकारीसँगको झडपमा इलाका प्रहरी कार्यालय दमकका डिएसपी मनोजकुमार लामासहित १० जना प्रहरी घाइते भएको जिल्ला प्रहरी कार्यालय झापाका डिएसपी खगेन्द्रप्रसाद रिजालले बताउनु भयो ।
घाइतेहरुको स्थानीय स्वास्थ्य संस्थामा उपचार गरिएको प्रहरीको भनाइ छ ।
आन्दोलनकारी र प्रहरी घाइते भएको पुष्टि भएपनि उनीहरुको यकिन विवरण प्राप्त हुन सकेको छैन ।
तत्कालीन प्रदेश न.१ को प्रदेशसभाको दुई तिहाइले ०७९ फागुन १७ गते प्रदेश न. १ को नामाकरण कोशी प्रदेश गरेको छ ।
प्रदेश सरकारले फागुन १८ गते प्रदेश राजपत्रमा कोशी प्रदेश नामाकरण गरी सूचना प्रकाशन गरेको छ ।
नामाकरण खारेज गरी किराँत प्रदेश नामाकरण माग गर्दै फागुन १८ गतेदेखि विरोध हुँदै आएको छ ।