विराटनगर महानगरपालिका–१९ की २८ वर्षीया प्रियङ्का सुनास साहको हत्या गरेको आरोपमा प्रहरीले २९ वर्षीय पति रमेश साहसहित थप तीन जनालाई फागुन ८ गते गिरफ्तार गरेको छ ।
प्रहरीले हत्यामा संलग्न भएको आशङ्कामा कटहरी गाउँपालिका–५ का ६२ वर्षीय रमानन्द साह र सोही ठाउँका ३५ वर्षीय उमेश सरदार र ६३ वर्षीय श्रीराम चौधरीलाई अनुसन्धानका लागि घरबाटै गिरफ्तार गरेको जिल्ला प्रहरी कार्यालयका एसपी दीपक पोखरेलले बताउनु भयो ।
पत्नीले परपुरूषसँग अनैतिक सम्बन्ध राखेको आशङ्कामा २९ वर्षीय पति रमेश साहले फागुन ७ गते घुम्ने बहानामा बुढीगङ्गा गाउँपालिका–२ स्थित रमानन्द साहका दाजु नर्सिङ्ग साहको घरमा पुर्याएर घाँटी थिचि हत्या गरेको प्रारम्भिक अनुसन्धानमा क्रममा बयान दिएको एसपी पोखरेलले बताउनु भयो ।
बुढीगङ्गा गाउँपालिका–२ स्थित नर्सिङ्ग चौधरीको घरमा फागुन ८ गते बोरामा पोको पारेको अवस्थामा प्रियङ्का सुनार साहको शव फेला पारेपछि प्रहरीले योजनावद्ध हत्या भएको निश्कर्ष निकाल्दै घटनामा संलग्नहरूलाई गिरफ्तार गरेको जिल्ला प्रहरी कार्यालयका एसपी दीपक पोखरेलले बताउनु भयो ।
शवको मुचुल्काका क्रममा घाँटीमा र कानमा चोट देखिएकाले कुटपिट गरेर हत्या गरेको हुन सक्ने अनुमान प्रहरीले गरेको छ । मृत्युको यकिन कारण भने पुष्टि हुन बाँकी रहेको एसपी पोखरेलको भनाइ छ ।
मृतकको माइती घर भारत भएका कारण पीडित परिवार सम्पर्कमा आएपछि शवको पोष्टमार्टम गरिने प्रहरीले जनाएको छ ।
शवको पोष्टमार्टमका लागि कोशी अस्पतालको पोष्टमार्टम गृहमा फागुन ९ गते राखिएको छ ।