११ वर्षीया बालिकालाई यौन दुर्व्यवहार गरेको कसुरमा जिल्ला अदालतले विर्तामोड नगरपालिका–४ का ५१ वर्षीय नेत्रप्रसाद वाग्लेलाई २० दिन कैद सजायको फैसला सुनाएको छ ।
जिल्ला अदालतका न्यायाधीश रोशन गजुरेलको पुस १३ गतेको इजलासले कसुर गरेको ठहर गर्दै कैद सजायसँगै १० हजार रुपियाँ जरिबानाको आदेश भएको अदालतका सूचना अधिकारी अर्जुनप्रसाद गुराँगाइले बताउनु भयो ।
बालिकालाई ०७९ जेठ ९ गते यौन दुर्व्यवहार गरेको आरोपमा पीडित पक्षले वाग्लेविरुद्ध जेठ २६ गते इलाका प्रहरी कार्यालय अनारमनीमा उजुरी दिएको थियो ।
आरोपितलाई प्रहरीले जेठ २६ गते जिल्ला अदालतमा असार १४ गते बलात्कार शीर्षकमा मुद्दा दर्ता गरेको थियो ।
जिल्ला अदालतका न्यायाधीश गिरीराज गौतमको असार १५ गतेको आदेशमा आरोपित पुर्पक्षका लागि थुनामा थिए ।
पीडितको स्वास्थ्य परीक्षण जेठ २६ गते मेची अञ्चल अस्पताल भद्रपुरमा गरिएको थियो ।