तीन वर्षीया बालिकालाई बलात्कार गरेको कसुरमा जिल्ला अदालतले ताप्लेजुङ, सिरीजङ्घा गाउँपालिका–२ स्थायी घर भइ मेचीनगर नगरपालिका–८ का ५४ वर्षीय रामकुमार खड्कालाई १२ वर्ष कैद सजायको फैसला सुनाएको छ ।
न्यायाधीश इश्वरमणि ओझाको मङ्सिर २६ गतेको आदेशले १२ वर्ष कैद सजायको फैसला गरेको अदालतका सूचना अधिकारी अर्जुनप्रसाद गुरागाँईले बताउनु भयो ।
पीडित बालिकालाई आरोपितले ०७८ मङ्सिर १५ गते बलात्कार गरेको आरोपमा पीडित पक्षले आरोपितविरूद्ध मङ्सिर १६ गते इलाका प्रहरी कार्यालय काड्डभिट्टामा उजुरी दिएको थियो ।
पीडित पक्षको उजुरीका आधारमा आरोपितलाई प्रहरीले सोही दिन घरबाटै गिरफ्तार गरेको थियो ।
आरोपितविरूद्ध प्रहरीले जिल्ला अदालतमा ०७८ पुस ८ गते बलात्कार शीर्षकमा मुद्दा दर्ता गरेको थियो ।
जिल्ला अदालतका न्यायाधीश दिलकुमार वर्देवाको पुस ९ गतेको आदेशमा आरोपित पुर्पक्षका लागि थुनामा थिए ।
पीडितको स्वास्थ्य परीक्षण जिल्ला अस्पतालमा ०७८ मङ्सिर १६ गते गरिएको थियो ।