निर्वाचन आयोगले दोलखाका चार ओटा मतदानस्थलका १० ओटा मतदान केन्द्रमा मङ्सिर १५ गते पुनः मतदान गराउने भएको छ । जिल्ला निर्वाचन व्यवस्थापन समितको मङ्सिर १२ गते बसेको बैठकले मङ्सिर १५ गते मतदान गर्ने निर्णय गरेको सहायक निर्वाचन अधिकृत शिवकुमार पोखरेलले जानकारी दिनु भयो । उहाँले मतदानको तयारी सुरु गरिएको पनि बताउनु भयो ।
निर्वाचन आयोगले मङ्सिर ११ गते मुख्य निर्वाचन अधिकृतको कार्यालय दोलखालाई मङ्सिर १५ गतेभित्र निर्वाचन गराइसक्न निर्देशन दिएपछि जिल्ला निर्वाचन व्यवस्थापन समितिको बैठकले निर्वाचनको मिति तोकेको हो ।
मुख्य निर्वाचन अधिकृतको कार्यालयमा नेकपा एमालेका उम्मेदवार बालकृष्ण सिवाकोटीले बुथ कब्जा भएको उजुरी दिएपछि निर्वाचन आयोगबाट आएको जाँचबुझ आयोगले मङ्सिर ४ मा सम्पन्न मतदान प्रकृया धाँधली भएको पुष्टि गर्दै पुन: निर्वाचन गर्न सिफारिस गरेका थियो । सोही सिफारिसका आधारमा आयोगले पुन: निर्वाचन गर्ने निर्णय गरेको थियो ।
आयोगको निर्णय अनुसार बैत्यश्वरको वडा नं. ६ (क, ख, ग), वडा नं. ३ कालिढुङ्गा (क, ख, ग), वडा नं. २ को जनज्योति (क, ख) र तामाकोसीको जामुने हेल्थपोस्ट (क, ख) केन्द्रमा मतदान हुने भएको हो ।