खडक नगरपालिका–१० का १५ वर्षीय सागर सरदारको हत्या गरेको कसुरमा सप्तरी जिल्ला अदालतले सात जनालाई भदौ १९ गते कैद सजाय र जरिबानाको फैसला गरेको छ ।
न्यायाधीश हेमन्त रावलको इजलासले सोही ठाउँका ४८ वर्षीय शिवनारायण साहलाई २० हजार रुपियाँ जरिबाना तथा २१ वर्षीय जितेन्द्र सरदार र १९ वर्षीय देवेन्द्र सरदारलाई जनही एक वर्ष कैद, १० हजार रुपियाँ जरिबाना र १० हजार रुपियाँ क्षतिपूर्ति भराउने सजाय गरेको छ ।
यसैगरी १७ वर्षीय दुई बालकलाई चार महिना कैद र २ हजार रुपियाँ जरिबाना तथा १४ वर्षीय दुई बालकलाई एक/एक महिना कैदको फैसला भएको छ ।
आरोपितहरूले बगैँचामा खेल्ने क्रममा ०७६ मङ्सिर ८ गते हत्या गरी सागरको शव लुकाउन खोजेको भन्दै मृतककी दिदी मनिषा सरदारले मङ्सिर १३ गते इलाका प्रहरी कार्यालय कल्याणपुरमा उजुरी दिएकी थिइन् ।
हत्या घटनामा संलग्न रहेको आरोपमा सप्तरी प्रहरीले सातै जनालाई मङ्सिर १३ गते गिरफ्तार गरेको थियो ।
आरोपित शिवनारायणको बारीमा लगाएको गाँजा चोर्न प्रवेश गरेका बालकहरूमध्ये सागरको करेण्ट लागेर मृत्यु भएको गिरफ्तार सागरका अन्य साथीहरूले बताएका थिए ।
करेण्ट लागेर मृत्यु भएका सागरको शव ०७६ मङ्सिर ९ गते घटनास्थलभन्दा ५ सय मिटर पूर्व कालिचन साहको बगैँचामा फेला परेको थियो ।
घटना शङ्कास्पद भएपछि शवको पोष्टमार्टम धरानस्थित बिपी कोइराला स्वास्थ्य विज्ञान प्रतिष्ठानमा मङ्सिर १० गते गरिएको थियो ।
जिल्ला अदालतमा ०७६ पुस १ गते अभियोजनपत्र दायर भएकोमा अदालतको ०७६ पुस ३ गतेको आदेश अनुसार शिवनारायण ५० हजार रुपियाँ, देवेन्द्र र जितेन्द्र जनही १५ हजार रुपियाँ धरौटी राखेर पुर्पक्षका लागि रिहा भएका थिए । अन्य आरोपित चार बालकहरू संरक्षकको जिम्माजमानीमा रिहा भएका थिए ।