१५ वर्षीया बालिकालाई बलात्कार गरी तीन वर्षदेखि फरार रहेका कसुरदार महाकाली नगरपालिका–२ का २० वर्षीय हरिश बम आफ्नै घरमा लुकिछिपी बसेको अवस्थामा प्रहरीले भदौ ६ गते गिरफ्तार गरेको छ ।
जिल्ला अदालतले कसुर ठहर गरी कैद सजायको फैसला सुनाएको भएपनि कसुरदार फरार रहेकाले तीन वर्षपछि गिरफ्तार गरिएको जिल्ला प्रहरी कार्यालयका इन्स्पेक्टर भरत गिरीले इन्सेक प्रतिनिधिसँगको फोन सम्पर्कमा बताउनु भयो ।
०७६ माघ २७ गते जिल्ला अदालतको फैसला अनुसार बंमलाई १ वर्ष ८ महिना कैद र ६ हजार ७ सय रपियाँ सजायको फैसला भएकोले कसुरदारलाई भदौ ६ गते जिल्ला अदालतमा पेस गरी सजाय भुक्तानिका लागि कारागार चलान गरिएको इन्स्पेक्टर गिरीले बताउनु भयो ।
०७६ साउन १२ गते बालिकालाई बलात्कार गरेको भन्दै पीडित पक्षले आरोपित बंम विरुद्ध जिल्ला प्रहरी कार्यालयमा साउन २१ गते उजुरी दिएका थिए ।
प्रहरीले सरकारी वकिल कार्यालयमार्फत आरोपित विरुद्ध ०७६ साउन २५ गते जबरजस्तीकरणी अन्तर्गत जिल्ला अदातलमा मुद्दा दर्ता गरेको थियो ।
पीडितको स्वास्थ्य परीक्षण ०७६ साउन २१ गते महाकाली अस्पतालमा भएको थियो ।