१२ वर्षीया बालिकालाई बलात्कार गरेको आरोपमा प्रहरीले सिद्धिचरण नगरपालिका–३ स्थित नारायणस्थान माध्यमिक विद्यालयका प्रधानाध्यापक ४० वर्षीय पूर्णप्रसाद फुयाँलसहित स्थानीय तीन जनालाई गिरफ्तार गरेको छ ।
नारायणस्थान माविमा कक्षा ८ मा अध्ययनरत बालिकालाई आरोपितहरूले पटकपटक बलात्कार गरेको र अन्तिम पटक ०७९ जेठ २० गते बलात्कार गरेको आरोपमा प्रअसहित सिद्धिचरण नगरपालिका–३ का ३२ वर्षीय डम्बर भुजेल, ३१ वर्षीय केवल भुजेल र ७६ वर्षीय फडिन्द्रप्रसाद दाहाललाई जेठ ३० गते र प्रधानाध्यापक फुयाँललाई जेठ ३१ गते घरबाटै गिरफ्तार गरेको जिल्ला प्रहरी कार्यालयका इन्स्पेक्टर केशव अधिकारीले इन्सेक प्रतिनिधिसँगको फोन सम्पर्कमा बताउनु भयो ।
शिक्षकसहित अन्य तीन जनाले बालिकालाई धम्की र प्रलोभनमा पारी पटकपटक बलात्कार गरेको आरोपमा पीडित पक्षले आरोपितहरूविरूद्ध जेठ ३० गते जिल्ला प्रहरी कार्यालयमा उजुरी दिएपछि आरोपितलाई अनुसन्धानका लागि गिरफ्तार गरेको इन्स्पेक्टर अधिकारीले बताउनु भयो ।
पीडित बालिकको स्वास्थ्य परीक्षण जिल्ला अस्पतालमा जेठ ३० गते गरिएको छ ।