सुर्नया गाउँपालिकाका न्यायिक शाखाप्रमुख रामबहादुर महरामाथि सुर्नया गाउँपालिका–४ का स्थानीय जयन्त कुँवरको नेतृत्वको टोलीले हातापत गरेको भन्दै गाउँपालिकाले चैत १ गते विज्ञप्ति जारी गर्दै कार्वाहीको माग गरेको छ ।
सुर्नया गाउँपालिका वडा नम्बर ४ को कार्यालयमा लगाइएको ताला खोल्नका लागि छलफलमा सहभागि भएका शाखाप्रमुख महरामाथि स्थानीय कुँवरको नेतृत्वको टोलीले हातपात गरेपछि सुर्नया गाउँपालिकाले विज्ञप्ति जारी गरी कार्वाहीको माग गरेको सुर्नया गाउँपालिका वडा नम्बर ४ का वडाध्यक्ष दनेशप्रसाद भट्टले इन्सेक प्रतिनिधिसँगको फोन सम्पर्कमा बताउनु भयो ।
घटनाको छानविन गर्न र घटनामा संलग्न कुँवरलगायतका व्यक्तिहरुलाई कार्वाहीको माग गरी चैत १ गते जिल्ला प्रशासन कार्यालयमा समेत उजुरी दिएको वडाध्यक्ष भट्टको भनाइ छ ।
घटनाका सम्बन्धमा थप अनुसन्धान गरी प्रतिवेदन पठाउनका लागि जिल्ला प्रहरी कार्यालय र गाउँपालिकालाई पत्र पठाएको जिल्ला प्रशासन कार्यालयका प्रशासकीय अधिकृत खगेन्द्र भारथीले बताउनु भयो ।
वडा कार्यालयमा लगाएको ताल खोल्ने सम्बन्धमा छलफल भइरहेका बेला तालाबन्दी गर्ने पक्षले महरामाथि हातपात गर्नुको साथै जनप्रतिनिधिहरुलाई समेत गालिगलौज गरेको गाउँपालिकाले जारी गरेको विज्ञप्तिमा उल्लेख छ ।
वडा कार्यालयमा लगाएको ताला खुलाउने बिषयमा छलफल गर्न गाउँपालिका अध्यक्ष बीरबहादुर बिष्टको नेतृत्वमा वडा नम्बर ६ का अध्यक्ष जयबहादुर कुँवर, वडा नम्बर ४ का अध्यक्ष दिनेशप्रसाद भट्ट, न्यायिक शाखा प्रमुख रामबहादुुर महरालगायतका व्यक्तिहरु सहभागि भएका थिए ।
प्रधानमन्त्री रोजगार कार्यक्रमका लागि फारम भर्ने बेला वडा कार्यालयका कर्मचारीहरुले पूर्वाग्रहीपूर्ण व्यवहार गरेको भन्दै स्थानीयहरुले १४ बुँदे माग सहित वडा कार्यालयमा फागुन २७ गतेदेखि तालाबन्दी गर्दै आएका छन् ।
वडा कार्यालयमा तालबन्दी गरिएपछि कार्यालयबाट प्रवाह गरिने सेवाहरु पनि प्रभावित भएपछि स्थानीय सेवाग्राहीहरुलाई समेत समस्या उत्पन्न हुँदै अएको वडाध्यक्ष दिनेशप्रसाद भट्टले बताउनु भयो ।
