राजनीतिक भेटघाटका लागि गृह जिल्ला उदयपुर आइपुग्नु भएका परराष्ट्र मन्त्री डाक्टर नारायण खड्कालाई त्रियुगा नगरपालिका–१० गाईघाटमा माघ २० गते कालो झण्डा देखाएको आरोपमा प्रहरीले तीन जना विद्यार्थी नेतालाई गिरफ्तार गरेको छ ।
प्रहरीले अखिल नेपाल राष्ट्रिय स्वतन्त्र विद्यार्थी यूनियन(अनेरास्वियू) जिल्ला अध्यक्ष त्रियुगा नगरपालिका–१० का २५ वर्षीय भुवन दाहाल, त्रियुगा नगरपालिका–४ बगाहका २६ वर्षीय अश्विन कार्की र कटारी नगरपालिका–३ का २९ वर्षीय मनोज तामाङ्गलाई झण्डा देखाउने क्रममा गिरफ्तार गरेको जिल्ला प्रहरी कार्यलयका डिएसपी बेदप्रसाद गौतमले इन्सेक प्रतिनिधिसँगको फोन सम्पर्कमा बताउनु भयो । आरोपित तीनै जनालाई त्रियुगा नगरपालिका–१० गाइघाटबाट अनुसन्धानका लागि गिरफ्तार गरेको डिएसपी गौतमले बताउनु भयो ।
विद्यार्थी नेता गिरफ्तारीमा परेपछि अनेरास्वियूका जिल्ला सहसंयोजक प्रवेश ठकुरी, युवा नेता सुरेन्द्र बस्नेतलगायतले रिहाइको माग गरेका छन् ।
गिरफ्तारीमा परेकाहरूको रिहाइका लागि प्रहरीसँग कुराकानी भइ रहेको अनेरास्वियू जिल्ला सहसंयोजक प्रवेश ठकुरीले इन्सेक प्रतिनिधिसँगको फोन सम्पर्कमा बताउनु भयो ।
समयमै स्थानीय तहको चुनाब घोषणा गर्न, महङ्गी र कालाबजारी नियन्त्रणको माग राख्दै विद्यार्थी नेताहरूले मन्त्री खड्कालाई कालो झन्डा देखाएका छन् ।