१७ वर्षीया बालिकालाई बलात्कार गरी गर्भपतन गराएको कसुरमा जिल्ला अदालत म्याग्दीले त्रिवेणी गाउँपालिका–१, सल्यानका २५ वर्षीय जनकबहादुर पुनलाई ११ वर्ष कैद सजायको फैसला सुनाएको छ ।
न्यायाधीश तेजनारायण पौडेलको ०७८ माघ १७ गतेको इजलासले कसुर ठहर गर्दै आरोपितलाई ११ वर्ष कैद, ३० हजार रुपिया जरिबाना र ३० हजार क्षतिपुर्ती भराउने फैसला सुनाएको जिल्ला अदालत म्याग्दीका श्रेष्तेदार तेजप्रसाद पौडेलले जानकारी दिनुभयो ।
पीडितलाई आरोपितले २०७६ साउन २९ गते बलात्कार गरी माघ २ गते पोखरामा लगेर जबरजस्ती गर्भपतन गराएको भन्दै पीडितले माघ ७ गते जिल्ला प्रहरी कार्यालय म्याग्दीमा उजुरी दिएकी थिइन् । सोही उजुरीका आधारमा प्रहरीले आरोपितलाई गिरफ्तार गरेको थियो ।
त्यस्तै नवलपरासी रामग्राम–४, घर भई पोखरा महानगरपालिका–८, स्थित उपचार स्वास्थ्य क्लिनीक सञ्चालन गरिरहेका ५१ वर्षीय डाक्टर राजेन्द्रकुमार चौधरी र गर्भपतन गराउँदा साँक्षी बस्ने बालिकाको ६६ वर्षीय बुबालाई जिल्ला अदालत म्याग्दीका न्यायाधीश तेजनारायण पौडेलको इजालसले २०७८ पुस २६ गते १ वर्ष कैद र ३० हजार रुपैयाँ जरिबाना तिराउने फैसला गरेको थियो ।
जिल्ला प्रहरी कार्यालय म्याग्दीको अनुसन्धान पश्चात २०७६ फागुन ४ गते जिल्ला सरकारी वकिल कार्यालयबाट जिल्ला अदालतमा अभियोगपत्र दर्ता गरेकोमा जिल्ला अदालतले फागुन ६ गते आरोपितलाई पूर्पक्षका लागि थुनामा पठाएको थियो भने आरोपित डाक्टर र बुबालाई धरौटी माग गर्ने आदेश दिएको थियो ।