१७ वर्षीया बालिकालाई बलात्कार गरेको कसुरमा जिल्ला अदालत पाल्पाले रम्भा गाउँपालिका–३ पिपलडाँडाका २३ वर्षीय सन्देश परियारलाई १० वर्ष कैदको फैसला सुनाएको छ ।
न्यायाधीश खड्कबहादुर केसीको इजलासले पुस १८ गते १० वर्ष कैद र ४ लाख रुपियाँ जरिबानाको फैसला गरेको अदालतका श्रेस्तेदार दुर्गाप्रसाद बस्यालले बताउनु भयो ।
पीडित बालिकालाई आरोपितले ०७७ चैत १३ गते बलात्कार गरेको भन्दै पीडित पक्षले चैत २० गते जिल्ला प्रहरी कार्यालय पाल्पामा उजुरी दिएको थियो । पीडित बालिकाको स्वास्थ्य परीक्षण चैत २० गते पाल्पा अस्पतालमा गरिएको थियो ।
आरोपितविरूद्ध प्रहरीले ०७८ वैशाख १४ गते जिल्ला अदालतमा बलात्कार शीर्षकमा मुद्दा दर्ता गरी कारवाही अगाडि बढाएकोमा जिल्ला अदालतको वैशाख १४ गतेकै आदेशले आरोपितलाई पुर्पक्षका लागि थुनामा पठाएको थियो ।