गणेशमान चारनाथ नगरपालिकाको पोर्ताहामा जनमत पार्टीले किसान आन्दोलनको नाममा अवरुद्ध गरेको पूर्वपश्चिम राजमार्ग खोलाउन पुस १८ गते प्रहरीले रबरको गोली प्रहार गर्दा पाँच जना जनमत पार्टीका कार्यकर्ता घाइते भएका छन् ।
प्रहरीको गोली लागेर शहिदनगर नगरपालिका–१ कुम्भकरण क २५ वर्षीय जनमत विद्यार्थी सङ्घका धनुषा जिल्ला अध्यक्ष विजयकुमार यादव घाइते हुनु भएको छ । घाइते विजयको दाहिने पैतालामा गोलीको छर्रा लागेको छ ।
कमला नगरपालिका–८ का जनमत दलित सङ्घका धनुषा जिल्ला उपाध्यक्ष ३६ वर्षीय नथुन विराजी यादवको कोखामा चोट लागेको छ ।
विदेह नगरपालिका–५ मुरिवाका ५१ वर्षीय जनमत दलित सङ्घका धनुषा जिल्ला उपाध्यक्ष रामदयाल मुखियाको दाहिने जाँघमा चोट लागेको छ ।
जनकनन्दनी गाउँपालिका–४ खजुरी चन्हाका जनमत युवा सङ्घ धनुषा जिल्ला सचिव २२ वर्षीय बैद्यनाथ साह घाइते हुनुभएको छ । उहाँको टाउको र दाहिने काँघमा चोट लागेको छ ।
सवैला नगरपालिका–१ मुसहरी टोल स्थायी घर भई जनकपुरधाम उपमहानगरपालिका–४ पिडरियामाई स्थान बस्ने जनमत एनआरएन सङ्घका भूपु उपाध्यक्ष इन्जिनियर ४६ वर्षीय सञ्जय साह घाइते हुनु भएको छ । उहाँको टाउको र गोडामा चोट लागेको छ ।
घाइते पाँचै जनाको प्रादेशिक अस्पताल जनकपुरमा उपचार भइरहेको छ । घाइते विजयकुमार यादवले ३० जना जतिको सङ्ख्यामा शान्तिपूर्ण आन्दोलन गरिरहँदा दिउँसो करिब एक घण्टा अवरुद्ध गरेपछि प्रहरीको टोलीले राजमार्ग खुलाउन दबाब दिँदा आफूहरूले नमानेपछि एक्कासी प्रहरीले टियर ग्याँस र रवरको गोली प्रहार गरेको आरोप लगाउनु भयो ।
जिल्ला प्रहरी कार्यालय धनुषाका डिएसपी जितेन्द्रकुमार बस्नेतले राजमार्ग अवरुद्ध गरेपछि राजमार्ग सुचारु गराउन पटकपटक आग्रह गर्दा पनि नमानेर अटेर गरेपछि ११ राउण्ड रबरको गोली र १६ राउण्ड अश्रुग्याँस प्रहार गरेको बताउनु भयो ।
जनमत पार्टीले किसानहरूको पक्षमा विभिन्न माग राखी पुस १५ गतेदेखि प्रदेश २ का धनुषा, महोत्तरी, सिरहा र सप्तरी जिल्ला अनिश्चितकालका लागि बन्दको घोषणा गरेको थियो ।