३३ वर्षीया महिलालाई बलात्कार गरेको कसुरमा जिल्ला अदालत पर्वतले मोदी गाउँपालिका–३ का ३५ वर्षीय कणर्बहादुर पुनलाई सात वर्ष कैद सजायको फैसला गरेको छ ।
न्यायाधीश बलराम त्रिपाठीको ०७८ पुस १ गतेकाे इजलासले कसुर ठहर गर्दै पुस १४ गते आरोपितलाई सात वर्ष कैद सजाय, २ लाख रुपियाँ जरिबाना र २ लाख रुपियाँ क्षतिपुर्तिको फैसला गरेको जिल्ला अदालत पर्वतका श्रेस्तेदार रामबहादुर थापाले जानकारी दिनुभयो ।
पीडितलाई आरोपितले ०७७ पुस २२ गते बलात्कार गरेको भन्दै पीडित पक्षले आरोपितविरुद्ध जिल्ला प्रहरी कार्यालय पर्वतमा उजुरी दिनुभएको थियो ।
पीडित पक्षको उजुरीपछि आरोपितलाई गिरफ्तार गरी उनीविरुद्ध ०७७ माघ १६ गते पर्वत जिल्ला अदालतमा जबरजस्ती करणी शीर्षकमा मुद्दा दर्ता गरिएको थियो ।
जिल्ला अदालतको सोही दिनको आदेशले आरोपित पुर्पक्षका लागि थुनामा थिए ।
पीडितको स्वास्थ्य परीक्षण ०७७ पुस २३ गते पर्वत अस्पतालमा भएको थियो ।