औरही गाउँपालिका–५ की २१ वर्षीया अनिता यादवलाई २६ वर्षीय पति विनोद यादवले आगो लगाई हत्या गरेको कसुर ठहर गर्दै जिल्ला अदालतले साउन २८ गते आजिवन कारावासको फैसला गरेको छ ।
न्यायाधिश मनोजकुमार श्रीवास्तवको इजलासले यस्तो फैसला गरेको हो । अनितालाई ०७६ माघ १० गते चारित्रिक आरोपमा पति विनोदले आगो लगाई हत्या प्रयास गरेको जनाइएको छ ।
आगो लगाएपछि उपचारका लागि विराटनगरस्थित म्याक्स अस्पताल लगेकोमा म्याक्स अस्पतालले थप उपचारको लागि काठमाडौँ रेफर गरेको थियो । काठमाडौँको किर्तिपुर मोडेल अस्पतालमा माघ १२ गते बिहान डाक्टरले अनितालाई मृत घोषणा गरेका थिए ।
मृतक अनिताका बुबा अशोक यादवले जिल्ला पहरी कार्यालय सिरहामा माघ १२ गते उजुरी दिनु भएको थियो । शवको पोष्टमार्टम काठमाडौँस्थित शिक्षण अस्पताल माहाराजगञ्जमा माघ १२ गते गरिएको थियो ।
जिल्ला प्रहरी कार्यालय सिरहाले विनोदलाई माघ ११ गते मोरङ प्रहरीको सहयोगमा गिरफ्तार गरेकोमा जिल्ला अदालतको आदेशमा फागुन ८ गतेदेखि पुर्पक्षका लागि थुनामा राखिएको प्रहरीले जनायो ।