अनौपचारिक क्षेत्र सेवा केन्द्र इन्सेक ले सञ्चालन गर्दै आएको परियोजना तथा मुख्य कार्यक्रमको एक वर्षको समीक्षा तथा आगामी वर्षको योजना बैठक असार २५ गते सम्पन्न गरिएको छ ।
असार २४ र २५ गते काभ्रेको धुलिखेलमा आयोजित बैठकमा इन्सेककी अध्यक्ष डाक्टर इन्दिरा श्रेष्ठले देशैभर सञ्चालित कार्यक्रमलाई उपलब्धिमूलक बनाउन इन्सेककर्मीले समुदायसँग मिलेर काम गर्नु पर्ने बताउनु भयो ।
उहाँले मानव अधिकारको संरक्षण र सम्बर्द्धनका लागि इन्सेकले विगतदेखि नै समुदायसँग मिलेर काम गरेको बताउँदै समुदायसँग मिलेर समुदायकै हितमा काम गर्नु पर्नेमा जोड दिनु भयो ।
इन्सेकका कार्यकारी निर्देशक विजयराज गौतमले इन्सेकले जारी गरेका आचारसंहिताको पूर्ण पालनामा जोड दिँदै मानव अधिकारको क्षेत्रमा सम्वेदनशील भएर काम गर्न आग्रह गर्नु भयो ।
इन्सेकले तय गरेका कार्यक्रमलाई सफल बनाउनका लागि इन्सेकमा कार्यरत सबै कर्मचारको उत्तिकै भूमिका हुने भएकाले तोकिएको जिम्मेवारी पूरा गर्न निर्देशन दिनु भयो ।
कार्यक्रममा इन्सेक केन्द्रीय कार्यालयका सम्बन्धित कार्यक्रमका व्यवस्थापकले एक वर्षको प्रगतिका बारेमा प्रस्तुती गरेका थिए ।
कार्यक्रममा मानव अधिकार प्रलेख तथा पैरवी कार्यक्रमका तर्फबाट श्रीराम बजगाईं र सम्झा श्रेष्ठले, मानव अधिकार शिक्षा कार्यक्रमका तर्फबाट मदन पौडेलले र व्यवस्थापन कार्यक्रमका तर्फबाट सुबेच्छा खड्काले अवस्थाका बारेमा प्रस्तुत गर्नु भएको थियो ।
त्यसैगरी सातै प्रदेशका प्रस्तुतीपछि आगामी वर्षको योजना तयार पारिएको योजना, अनुगमन तथा मूल्याङ्कन कार्यक्रमकी सलिना भट्टराईले जानकारी दिनु भयो ।
कार्यक्रममा इन्सेक केन्द्रीय कार्यालयका साथै सातै प्रदेशका इन्सेककर्मकी सहभागिता रहेको थियो ।
