२६ वर्षीया महिलालाई बलात्कार गरेको कसुरमा जिल्ला अदालतले खडग नपा–१० बेल्हाका ३९ वर्षीय सुधलाल भनिने शुभलाल सरदारलाई माघ २६ गते सात वर्ष कैद सजायको फैसला सुनाएको छ ।
जिल्ला न्यायाधीश अम्बिकाप्रसाद दाहालको इजलाशले कसुर ठहर गर्दै सो सजायको फैसला गरेको अदालतका सूचना अधिकारी हेमबहादुर बुढाथोकीले जानकारी दिनु भयो ।
जिल्ला अदालतको आदेशमा आरोपित ०७६ भदौ १९ गतेदेखि पुर्पक्षका लागि राजविराज कारगारमा थुनामा छन् ।
सरदारले ०७५ पुस २० गते र ०७६ साउन १८ गते बलात्कार गरेको भन्दै पीडितले इलाका प्रहरी कार्यालय, कल्याणपुरमा ०७६ साउन २६ गते उजुरी दिएपछि प्रहरीले सोही दिन आरोपितलाई गिरफ्तार गरी उजुरी दर्ता गरेको थियो ।
पीडित महिलाको राजविराजस्थित गजेन्द्रनारायण सिंह अस्पतालमा ०७६ साउन २७ गते स्वास्थ्य परिक्षण गरिएको थियो ।
सरदारकै भनाइमा धरानस्थित वि.पी. कोइराला स्वास्थ्य विज्ञान प्रतिष्ठान गई ०७६ साउन १ गते चार महिनाको गर्भपतन गराएको र ०७६ फागुन २७ गते कञ्चनरुप पिप्राका सियाराम सरदारसँग भएको वैवाहिक सम्बन्ध पनि विच्छेद भएको पीडितले बताउनु भयो ।