संसद विघटन असंवैधानिक भएकाले अझै संसद जिउँदो रहेको जिकिरसहित नेकपाका चार जना सांसदले सर्वोच्च अदालतमा रिट दायर गरेका छन् ।
नेकपाका प्रमुख सचेतक देव गुरूङ, सांसद कृष्णभक्त पोखरेल, शशी श्रेष्ठ र रामकुमारी झाँक्रीले पुस ७ गते सर्वोच्चमा रिट दायर गरेको सांसद कृष्णभक्त पोखरेलले इन्सेक अनलाइनलाई जानकारी दिनु भयो ।
सांसद पोखरेलले भन्नु भयो–‘संसद विघटन सम्बन्धमा हाम्रो संविधान कतै पनि बोल्दैन । संविधानमा नै नभएको व्यवस्थालाई प्रधानमन्त्रीले सिफरिस गर्नु र राष्ट्रपतिले सरकारको सिफारिसमा संसद विघटन गर्नु संविधान विपरीत छ । त्यसैले सो को खारेजीको माग गरिएको हो ।’
रिटमा मन्त्रिपरिषद्को सिफारिसमा राष्ट्रपति विद्यादेवी भण्डारीले पुस ५ गते गर्नु भएको प्रतिनिधिसभा विघटन संविधान विपरीत भएको भन्दै अझै संसद जीवित रहेको आदेश गर्न सर्वोच्चसमक्ष माग गरिएको छ ।