काठमाडौंबाट प्रकाशित हुँदै आएको युगव्यथा साप्ताहिकका संवाददाता उत्तम प्रसाईं एक हप्तादेखि बेपत्ता भएको भन्दै नेपाल पत्रकार महासङ्घ काठमाडौँ शाखाले खोजी गरिदिन आग्रह गरेको छ ।
काठमाडौँ शाखाका अध्यक्ष शन्तराम बिडारीले असोज २४ गते प्रेस विज्ञप्ति प्रकाशन गरी पत्रकार प्रसाईंको वास्तविक अवस्था यथाशीघ्र सार्वजनिक गर्न माग गर्नुभएको हो ।
विज्ञप्तिमा भनिएको छ– “असोज १८ गते दिँउसो एक बजेसम्म कोठामै रहेका उनी गजुरी स्थित सिसीटिभी फुटेजमा बेग गतिका साथ आफ्नै मोटरसाइकलमा मुग्लिनतिर गएको देखिएको छ भने भोलिपल्ट मुग्लिन स्थित मुग्लिन–नारायणगढ खण्डको ३ नम्मर पुल छेउ हेल्मेट र चाबी सहित उनको मोटरसाइकल सडक छेउमै भेटिएको छ ।”
पत्रकार प्रसाईंको अवस्थाका बारेमा मुग्लिन स्थित इलाका प्रहरी कार्यालय र चितवन स्थित जिल्ला प्रहरी कार्यालयको प्रहरी टोलीले अनुसन्धान जारी राखेको बताए पनि ठोस स्थिति पत्ता लाग्न नसक्दा परिवार र पत्रकार वृतमा आशङ्का पैदा भएको विज्ञप्तिमा उल्लेख छ ।
महासङ्घ जिल्ला शाखाले विज्ञप्तिमार्फत् नेपाल प्रहरीलाई प्रसाईंको मोबाइल कल ट्राकिङ मार्फत वास्तविकता पत्ता लगाउन सबै प्रकारका संयन्त्रहरू परिचालन गर्न समेत आग्रह गरेको छ ।