कोरोना भाइरस(कोभिड–१९) को सङ्क्रमण रोकथाम तथा जोखिम न्यूनीकरणका लागि सरकारले चैत ११ गतेदेखि लगाएको लक डाउनका कारण अलपत्र भएका ४५ जना मजदूरलाई जिल्ला प्रशासन कार्यालयले चैत २० गते उद्दार गरेको छ ।
लकडाउनका कारण धनकुटामा अलपत्र परेका मजदूरलाई चौविसे गाँउपालिकाको सहजीकरणमा आवश्यक यात्रा अनुमति पत्र जारी गरी उद्दार गरेको धनकुटाका प्रमुख जिल्ला अधिकारी केशवप्रसाद विमलीले बताउनुभयो ।
धनकुटा, पाँचथर र सुनसरी जिल्ला जोड्ने तमोर करिडोरका विभिन्न स्थानमा सडक निर्माणका क्रममा मजदुर खटिँदै आएका ४५ जना मजदूरको उद्धार गरिएको चौविसे गाँउपालिकाले जनाएको छ ।
पछिल्लो विषम अवस्थाका कारण उनीहरूको दैनिक मजदूरीको काम रोकिएपछि मजदूर अलपत्र परेका थिए । रौता सन्तोषी जेभी कस्न्ट्रक्सनमार्फत लावरबोटेदेखि नावा खोलासम्मको सडक निर्माणमा रहेका मजदुरलाई घर फर्काएको कम्पनीका सुपरभाइजर राजन थापाले बताउनु भयो । उद्धार गरिएका मजदुरहरू सिन्धुली, दोलखा, इलाम, पाँचथर, धनकुटा, गोर्खा, सिन्धुपाल्चोक लगायतका छन् ।
त्यस्तै सुनसरीको चतरामा रहेका ३० जना मजदूर भने अझै सोही स्थानमा अलपत्र रहेको सुपरभाइजर उदय कार्कीले जानकारी दिनुभयो । कतिपय पैदल हिँडेरै घरतर्फ फर्किएको कार्कीको भनाइ छ ।
शर्मा एन्ड कम्पनी कस्न्ट्रक्सनमार्फत सुनसरीको चतरास्थित बराहा क्षेत्रको १६ किलोमिटर क्षेत्रफलमा निर्माणाधीन सडकमा ती मजदुर रहेका छन । उनीहरू बाँके, रामेछाप, नवलपरासी, रुपन्देही, उदयपुर, सप्तरी लगायत जिल्लाका रहेका छन् ।
अपलत्र परेकालाई सम्बन्धित निर्माण कम्पनीले प्रशासनमा जानकारी गराएमा उद्दार गर्न सकिने धनकुटाका प्रमुख जिल्ला अधिकारी विमलीले बताउनु भयो । उहाँले अलपत्र परेका सबैलाई प्रक्रियागत रूपमा उद्दार गरिने बताउनु भयो ।