कर्णाली प्रदेश सरकारले स्वदेश तथा विदेशबाट कर्णाली प्रदेशका विभिन्न जिल्लामा पुग्ने गरी हिँडेका तर लकडाउनका कारण गन्तव्यमा पुग्न नसकी बीच बाटोमा अलपत्र परेका यात्रुलाई गन्तव्यमा पुु¥याउनका लागि हटलाइन सेवा सञ्चालन गरेको जनाएको छ ।
कर्णाली प्रदेशका सामाजिक विकास मन्त्री दल रावलले गन्तव्यमा पुग्न नसकेका यात्रुका लागि हटलाइन सेवा र उपचारको सुनिश्चित गरेको बताउनु भयो । मन्त्री रावलका अनुसार अलपत्र परेका यात्रुका लागि उद्दार गर्ने, उनीहरुको प्रारम्भिक स्वास्थ्य परीक्षण गर्ने तथा स्वास्थ्य अवस्थाको आधारमा क्वारेन्टाईनमा राख्नुपर्नेलाई क्वारेन्टाईनमा राख्ने र बाँकीलाई गन्तव्यसम्म पु¥याइने व्यवस्था मिलाइएको बताए ।
गन्तव्यमा पुग्न नसकेको यात्रुका लागि प्रदेश सरकारले १११० नम्बरको हटलाइनमा सम्पर्क गर्न समेत अनुरोध गरेको छ ।
यसैगरी प्रदेश सरकारले सुर्खेतका वीरेन्द्रनगरस्थित खुल्ला मञ्चमा १ सय २ जना व्यक्ति राख्न मिल्ने क्वारेन्टाईन निर्माण सम्पन्न गरी १ सय २ जनालाई राखिएको कर्णाली
प्रदेश सरकारले जनाएको छ ।
कोरोना भाइरसको रोकथाम तथा नियन्त्रणका लागि कर्णाली प्रदेशका जुम्ला, कालिकोट, हुम्ला, दैलेख र सल्यानबाट प्राप्त समाचार यस प्रकार रहेको छ ।
जुम्ला जिल्ला प्रतिनिधि मानदत्त रावलका अनुसार कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले सेनिटाइजर उत्पादन गर्न सुरु गरेको छ । नर्सिङ र फार्मेसीको टिमले प्रतिष्ठान भित्र १२ लिटर जति सेनिटाइजर उत्पादन गरेको प्रतिष्ठानका अस्पताल निर्देशक डा.मंगल रावलले बताउनु भयो ।
प्रतिष्ठानका रजिष्ट्रार विश्वराज काफ्लेका अनुसार अमेरिकन नेपाल मेडिकल फाउण्डेसनले उपलव्ध गराएको कच्चा पदार्थ प्रयोग गरी स्वास्थ्यकर्मीलाई सुरक्षित गर्ने प्लाष्टिकको पिपिई पनि निर्माण गरिएको छ ।
ज्वरो नाप्ने थर्माेस्क्यान नहुँदा समस्या
सिंजा भेगमा पर्ने हिमा गाउँपालिकाले हेल्थ डेक्ससहित ६ स्थानमा क्वारेनटाईन स्थापना गरेको छ । तर हेल्थ डेक्समा ज्वरो नाप्ने थर्माेस्क्यान नहुँदा चेकजाँचमा समस्या भइरहेको जनाएको छ ।
थर्माेस्क्यान खरिद गर्न निकै पहल गर्दा पनि नपाइएपछि स्वास्थ्यकर्मीले जोखिम मोलेर थर्मोमिटरले काखीमुनि च्यापेर ज्वरो नापीरहेको गाउँपालिका अध्यक्ष रजबहादुर शाहीले बताउनुभयो । सिंजा भेग र मुगु जिल्ला जाने प्रवेशद्धारमा पर्ने उक्त गाउँपालिकामा कोरोना भाइरसको त्रासले भारतबाट धेरै संख्यामा जिल्लाभित्र आइरहेका छन् ।
गाउँपालिकाका अनुसार मानु मावि पाथरखोलामा पाँच जना र राहदेव मावि मोफ्ला क्वारेनटाईनमा १९ जनालाई राखिएको छ ।
एकजनामा कोरोनाको आशंका
सिंजाका ३२ वर्षीय एक यूवालाई कोरोनाको आशंकामा क्वारेनटाईनमा राखिएको छ । भारतको कास्मीरबाट आएको ११ दिनपछि चेकजाँच गर्दा उच्च ज्वरो र निरन्तर खोकी लागेपछि यूवालाई क्वारेनटाईनमा राखिएको कर्णाली स्वास्थ्य विज्ञान प्रतिष्ठानका निर्देशक डा. मंगल रावलले बताउनुभयो ।
पातारासी गाउँपालिकास्थित क्वारेनटाईनमा पनि भारतको हिमाञ्चल प्रदेशबाट आएका ६ जनालाई राखिएको छ । यसैगरी जुम्ला प्रवेशद्वार नाग्ममा ३ दिनमा २ हजार ५ सय जनाको चेकजाँच गरिएको छ ।
कालिकोट जिल्ला प्रतिनिधि कालिबहादुर मल्लका अनुसार कोरोना भाइरस नियन्त्रणका लागि कालिकोटस्थित विभिन्न सरकारी तथा गैर सरकारी निकायको पहलमा २ सय ५४ बेडको क्वारेनटाईन निमार्ण गरिएको छ ।
स्थानीय तह, नेपाली सेना, नेपाल प्रहरी, सशस्त्र प्रहरी बल, उद्योग वाणिज्य संघ, होटल व्यवसायी संघ, रेडक्रस सोसाइटी र जिल्ला स्वास्थ्य कार्यालयको संयुक्त पहलमा उक्त क्वारेन्टाईन निर्माण गरिएको हो ।
कालिकोटका प्रमुख जिल्ला अधिकारी कृष्णचन्द्र पौड्यालका अनुसार रास्कोट नपामा एक सय, खाँडाचक्र नपामा ४९, शुभकालिका गाउँपालिकामा ४०, पचालझरना गाउँपालिकामा २० र नरहरीनाथ गाउँपालिकामा ५ बेड निर्माण गरिएको छ । यसका साथै जिल्लाका नौ ओटै स्थानीय तहमा अति आवश्यक खाद्य समाग्री, दैनिक उपभोग्य वस्तुको अभाव हुन नदिन उच्च सर्तकता अपनाइएको छ ।
जिल्लाको मुख्य प्रवेशद्वार दहीखोलामा हेल्थ डेक्स स्थापना गरिएको छ । हेल्थ डेक्समा चैत १३ गतेसम्म १ हजार ८० जनाको स्वास्थ्य जाँच गरिएकोमा कुनैमा पनि कोरोनाको लक्षण नभेटिएको जिल्ला अस्पताल कालिकोटका प्रमुख डा. भिष्म पोखरेलले जानकारी दिनुभयो ।
हुम्ला जिल्ला प्रतिनिधि नन्द सिंहका अनुसार जिल्ला बाहिरबाट आउनेको संख्यामा उल्लेख्य वृद्धि भएसँगै जिल्ला विपद व्यवस्थापन समितिले क्वारेन्टाईन कोठाको स्थापना गरिरहेको छ । जिल्ला सदरमुकाम सिमकोट बजारको नजिकै घर भाडामा लिएर क्वारेन्टाईनको व्यवस्था गरिन लागेको प्रमुख जिल्ला अधिकारी विनिता भट्टराईले जानकारी दिनुभयो ।
क्वारेन्टाईन व्यवस्थापनका लागि कर्णाली प्रदेशबाट ५० लाख, जिल्ला समन्वय समिति हुम्लाबाट १ लाख ५० हजार र उद्योग बाणिज्य संघबाट ७३ हजार २ सय ५० रुपियाँ संकलन भएको प्रजिअ भट्टराइको भनाई छ ।
५० सैयाको क्वारेन्टाईन तथा जिल्ला स्वास्थ्य सेवा कार्यालयमा तीन र नाम्खा गाउँपालिकामा एक गरी जम्मा चार ओटा आइसोलेशन वार्ड रहेको हुम्लामा संक्रमितको लक्षण देखिएका व्यक्ति फेला परेका छैनन् ।
उपकरण अभाब
कोरोनाको प्राथमिक उपचारका लागि आइसोलेसन र क्वारेन्टाईनमा आएकाहरुका लागि वार्डको व्यबस्था गरिए पनि आवश्यक उपकरणको अभाब देखिएको छ । जिल्लामै दुई वटा तापक्रम नाप्ने थर्मोगन र दुई सेट पिपिइ मात्र रहेको स्वास्थ्य सेवा कार्यालयका प्रमुख प्रेम बहादुर सिंहले बताउनु भयो ।
कोरोना पुष्टि भई आइसोलेसनबाट आइसियुमा राख्न विरामीलाई जिल्ला बाहिर रिफर गर्नु परेमा सडक यातायात नजोडिएको हुम्लामा थप समस्या सिर्जना हुनेमा सरोकारवालाको चिन्ता छ । हवाई नाका बन्द भएको र चीनसँगको हिल्सा नाका पनि बन्द भएकाले यस अवस्थामा मुगु जिल्लासँगको चंखेली र बाजुरासँगको कवाडी नाकाहुँदै भारतबाट फर्किहेका हुम्लाबासीहरु नै जिल्लाको पछिल्लो चुनौती बनेका छन् ।
दैलेख जिल्ला प्रतिनिधि अमर सुनारका अनुसार भारतका विभिन्न शहरबाट चैत ११ गते गौरीफण्टाहुँदै फर्किएका ३७ जनालाई स्थानीय प्रशासनको सहयोगमा सम्वन्धित गाउँसम्म पु¥याइएको छ । सुर्खेतबाट यातायातको प्रवन्ध गरी चैत १३ गते घर घरमा पु¥याइएको हो ।
ती मध्ये ज्वरोको संकेत देखिएका १० जनालाई सम्वन्धित पालिकामा स्वास्थ्यकर्मीको निगरानीमा घरमै क्वारेण्टाईनमा राखिएको दैलेखका प्रमुख जिल्ला अधिकारी युवराज कटेलले जानकारी दिनुभयो ।
भगवतीमाई गाउँपालिकामा पाँच, दुल्लु नपामा दुई, आठविस नपामा दुई र नौमुले गाउँपालिकामा एक जनालाई ज्वरो देखिएको दैलेख अस्पतालका इञ्चार्ज डा. निराजन पन्तले जानकारी दिनुभयो । उनीहरुको अवस्था जटिल भए जिल्लामा बनाइएको आइसोलेसनमा राखेर उपचार गरिने तयारी गरेको डा. पन्तको भनाई छ ।
कोरोना भाइरसको सम्भावित जोखिमलाई मध्यनजर गरी जिल्ला अस्पतालमा आठ वेडको आइसुलेसन वार्ड, नारायण क्याम्पसमा १ सय वेडको क्वारेण्टाईन र सरस्वती मावि तर्ताङ्गमा अस्थायी अस्पताल निर्माण गरिएको छ ।
जिल्लाका ११ स्थानीय तहका ९० वडामा भारत तथा अन्य मुलुकबाट आएका व्यक्तिको पहिचान भइरहेको र ती व्यक्तिलाई विभिन्न ठाउँमा बनाइएको क्यारेन्टाईनमा राखिने तयारी भएको दैलेखका इञ्चार्ज डिएसपी हरिबहादुर ओलीले योजना सुनाउनुभयो ।
सल्यान जिल्ला प्रतिनिधि मिना बुढाथोकीका अनुसार सल्यानको कपुरकोटमा हेल्थ क्याम्प राखी दाङबाट प्रवेश गर्नेहरुको चेकजाँच गर्ने गरिएको छ । हालसम्म २ हजार ७ सय ४६ जनाको स्वास्थ्य जाँच गर्दा संक्रमितहरु फेला नपरेको क्याम्पका फोकल पर्सन देवेन्द्र कुमार सेनले जानकारी दिनु भयो ।
यसैगरी संक्रमित फेला परेको अवस्थामा तिनको हेरचाह तथा उपचारका लागि जिल्ला स्वास्थ्य कार्यालयमा १४ जनालाई राख्न मिल्ने क्वारेन्टाईन बनाइएको छ । आवश्यकता अनुसार उद्योग बाणिज्य संघ श्रीनगर र विभिन्न कलेज एवम् विद्यालयलाई क्वारेन्टाईनको रुपमा प्रयोग गर्ने योजना बनाइएको जिल्ला प्रहरी कार्यालयका डिएसपी ठकेन्द्र खतिवडाले बताउनु भयो ।
जनतालाई उपभोग्य बस्तु खरिद बिक्री गर्नको लागि हरेक दिन साँझ ४ देखि ५ बजे बजार खुलाइने प्रवन्ध मिलाइएको डिएसपी खतिवडाले जानकारी दिनु भयो ।