पञ्चदेवल विनायक नगरपालिका–२ विनायकका वडा अध्यक्ष ४० वर्षीय पदमबहादुर धामीको हत्या घटनाको अनुसन्धानका लागि माघ २२ गते सात जनालाई प्रहरीले गिरफ्तार गरेको छ ।
सात जनालाई गिरफ्तार गरी अनुसन्धान भइरहेको प्रहरीले जनाए पनि गिरफ्तार गरिएका व्यक्तिहरुको परिचय भने खुलाइएको छैन ।
मृत अवस्थामा भटिएका वडा अध्यक्ष धामीसँग माघ २० गते सोही वडाको विनायक बजारमा साथमा रहेका सात जनालाई प्रारम्भिक अनुसन्धानका लागि गिरफ्तार गरिएको जिल्ला प्रहरी कार्यालय,अछामका इन्स्पेक्टर रमेशदत्त अवस्थीले बताउनु भयो । गिरफ्तार गरिएका सातै जनालाई इलाका प्रहरी कार्यालय विनायकमै राखेर सोधपुछ भइरहेको इन्स्पेक्टर अवस्थीको भनाइ छ ।
तालिम प्राप्त कुकुरसहित सिआइबीको टोलीले घटनास्थलमै अनुसन्धान गरिरहेको छ ।
माघ २१ गते बिहान सोही वडाको गैरीगाउँमा रहेको भैसी बाँध्ने गोठ छानामा वडा अध्यक्ष मृत अवस्थामा फेला परेका थिए ।
हत्यामा संलग्नको पहिचान नहुँदासम्म शवको पोष्टमार्टम गर्न नदिने भन्दै स्थानीयले शव उठाउन दिएका छैनन् । स्थानीयले घटनामा संलग्न दोषि तत्काल पत्ता लाउन माग गर्दै विनायक बजारमा नाराबाजीसहित टायर बालेर बजार बन्द गरेका छन् ।
मृततको पोष्टमार्टमका लागि प्रमुख जिल्ला अधिकारी, प्रहरी प्रमुख स्थानीय जनप्रतिनिधि र अगुवाको छलफलले समेत निष्कर्ष निकाल्न नसकेको स्थानीय भरतराज अधिकारीले बताउनु भयो ।
मृतक स्थानीय जाल्पेश्वरी प्राविको प्राधानाध्यापकबाट राजीनामा गरेर नेपाली काङ्ग्रेस पार्टीका तर्फबाट वडा अध्यक्षमा निर्वाचित भएका थिए ।