नेपाल विद्यार्थी संघको महाधिवेशन तत्काल गराउन माग गर्दै ४२ दिनदेखि नेपाली कांग्रेस पार्टी कार्यलय परिसर सानेपामा रिले अनसन स्थलमा झडप हुँदा तीनजना कार्यकर्ता घाइते भएका छन् । घाइते हुनेमा मोरङ जिल्ला घर भइ एनसी आइटी कलेज बालकुमारीका इकाई अध्यक्ष २३ वर्षीय सरोज थापा, गोर्खा जिल्ला घर भएका ताहाचल क्याम्पसका २६ वर्षीय कमल पन्त र अछाम जिल्ला घर भएकी २३ वर्षीया लक्ष्मी बोगटी रहेका छन् । उनीहरूको ललितपुरको सानेपास्थित स्टार अस्पतालमा उपचार भइरहेको छ ।
नेविसंघको विधान अनुसार तत्काल महाधिवेशनको माग गर्दै नेपाली कांग्रेसको पार्टी कार्यलय सानेपा, ललितपुरमा विद्यार्थीहरूले ०७६ पुस २ गतेदेखि सुरु गरेको रिले अनसनको ४२ औँ दिन माघ १३ गतेदेखि आमरण अनसनको तयारी भइरहेको बेला झडप भएको नेता कुन्दनराज काफ्ले बताउनु भयो ।
नेविसंघमा ३२ वर्षे उमेरहद लागू गर्नुपर्ने र अहिले नै गर्न नहुने पक्षबीच विवाद रहेको आमरण अनशनमा बसेका विद्यार्थी नेता गोपि सिवाकेटीले बताउनु भयो । झडप हुनुको मुख्य कारणमा कांग्रेस सभापति शेरबहादुर देउवाले आफ्नो पक्षकालाई नेतृत्व दिन खोजेकाले महाधिवेशन गराउन नचाहेको र गराए पनि विधान विपरित गराउन खोजेको असन्तुष्ट पक्षका विद्यार्थी नेताहरु बताउछन् । कांग्रेस कार्यालयमा झडप भएपछि प्रहरीले सुरक्षा दिएको महानगरिय प्रहरी परिसर ललितपुरका सहप्रवक्ता एवम् डिएसपी सन्तोष तामाङले बताउनु भयो ।