प्रतिबन्धित नेकपाका कार्यकर्ताहरूद्वारा प्रहरीको टोली माथि आक्रमण

नेत्रविक्रम चन्द (विप्लव) नेतृत्वको नेकपाका कार्यकर्तालाई गिरफ्तार गर्न जाने क्रममा पुस १६ गते दिउँसो सो पार्टीका कार्यकर्ताहरूले प्रहरी टोली माथि आक्रमण गरेको प्रहरीले जनाएको छ ।
पार्टीका जिल्ला नेता पञ्चपुरी नपा–८ बस्ने ५० वर्षीय बज्रबहादुर शाहीलाई गिरफ्तार गर्न जाने क्रममा सादा पोशाकमा गएका दुईजना प्रहरीलाई शाहीको घर नजिकै प्रतिबन्धित नेकपाका कार्यकर्ताहरूले फायरिङ्ग गरेको प्रहरीको भनाई छ । जवाफमा प्रहरीले दुई राउण्ड फायरिङ्ग गरेको जिल्ला प्रहरी कार्यालय, सुर्खेतका एसपी डिल्लीराज पन्तले जानकारी दिनुभयो ।
शाही सहित १० जनाको समुहमा रहेका नेकपाका कार्यकर्ताहरूले फायरिङ्ग गरेलगत्तै प्रहरीले जवाफी फायरिङ्ग गरेपछि नेकपाका कार्यकर्ता पछि हटेको र घटनामा भौतिक तथा मानवीय क्षति भने नभएको एसपी डिल्लीराज पन्तले बताउनुभयो ।
विप्लव नेतृत्वका नेकपाका कार्यकर्ताहरूले भेरीगंगा नगरपालिकाको छिन्चु र वीरेन्द्रनगर नपा–११ पिपिरामा रहेको एनसेल टावर नजिकै राखेको बमलाई पुस १६ गते नेपाली सेनाको टोलीले निष्कृय पारेको जिल्ला प्रहरी कार्यालय सुर्खेतले जनाएको छ ।